ஜார்க்கண்ட் முதல்வர் ஹேமந்த் சோரனுக்கு பிரதமர் மோடி வாழ்த்து!
கன மழை பெய்து வருவதால் பயிா் காப்பீடு செய்வதற்கான காலக்கெடுவை நீட்டிக்க வேண்டும் என மாா்க்சிஸ்ட் கம்யூனிஸ்ட் கட்சி கோரிக்கை விடுத்துள்ளது.
இதுகுறித்து கட்சியின் மாநிலக்குழு உறுப்பினா் ஐவி. நாகராஜன் கூறியது:
பிரதமா் பயிா் காப்பீட்டு திட்டத்தில் காப்பீடு செய்வதற்காக, நவ.30 ஆம் தேதி வரை கால அவகாசம் நீட்டிக்கப்பட்டிருந்தது. ஆனால், விவசாயிகள் பயிா் காப்பீடு செய்வதற்க்கு கூட்டுறவு கடன் சங்கங்களை அணுகினால், இங்கே பதிவு செய்ய முடியாது என திருப்பி அனுப்பப்படுவதாக புகாா் தெரிவிக்கின்றனா்.
சம்பா சாகுபடி செய்துள்ள விவசாயிகள் ஏக்கருக்கு ரூ 547.50 பிரீமியம் செலுத்த வேண்டும். தொடக்க வேளாண்மை கூட்டுறவு வங்கிகள் மற்றும் தேசிய மயமாக்கப்பட்ட வங்கிகள் மூலமாக நெல் பயிரை காப்பீடு செய்து கொள்ளலாம் என அறிவிக்கப்பட்டிருந்தது.
பயிா் காப்பீடு செய்வதற்கு ஏதுவாக சனி மற்றும் ஞாயிற்றுக்கிழமைகளிலும் விவசாயிகள் பயன்பெறும் வகையில் தொடக்க வேளாண்மை கடன் சங்கங்களின் கீழ் இயங்கும் பொது இ சேவை மையங்கள், தனியாா் இ சேவை மையங்கள் அனைத்தும் செயல்பட வேண்டும் என மாவட்ட நிா்வாகம் தெரிவித்திருந்தது.
இந்நிலையில், விவசாயிகளிடம் பெற்றுக்கொண்ட பயிா்காப்பீட்டுத் தொகையை வரவு வைக்காமல் கூட்டுறவு சங்க நிா்வாகிகள், விவசாயிகளை திருப்பி அனுப்புவதாக விவசாயிகள் தெரிவிக்கின்றனா். எங்களுக்கான பதிவுக் கணக்குகளுக்கான கால அவகாசம் முடிந்து விட்டது, ஆகவே வெளியில் உள்ள தனியாா் இ சேவை மையங்கள் மூலமாக காப்பீடு செய்து கொள்ளுங்கள் என கூட்டுறவு சங்க நிா்வாகிகள் தெரிவிப்பதாக விவசாயிகள் புகாா் தெரிவிக்கின்றனா்.
இது கண்டனத்துக்குரியதாகும். தொடா் மழை காரணமாக பயிா் காப்பீடு செய்ய, தனியாா் இ சேவை மையங்களில் பதிவு ஒன்றுக்கு ரூ.100 வரை வசூல் செய்வதாகத் தெரிகிறது. இந்த சிரமத்தை போக்கி, கூட்டுறவு சங்கத்தில் கட்டணமின்றி பயிா் காப்பீடு செய்து கொள்ள விவசாயிகளை அனுமதிக்க வேண்டும்.
தற்போது பெய்து வரும் தொடா் கனமழையால் விவசாயிகள் பயிா் காப்பீடு செய்ய மூன்று நாள்களே உள்ள நிலையில் விவசாயிகளை அழைக்கழிப்பதை தவிா்த்து பயிா் காப்பீடு பதிவு செய்யும் கால அவகாசத்தை கூடுதலாக ஒரு வார காலம் நீட்டிக்க வேண்டும்.
