மதுராந்தகம் அடுத்த மேல்மருவத்தூா் ஆதிபராசக்தி சித்தா் பீடத்தில் வெள்ளிக்கிழமை ஐப்பசி மாத அமாவாசையை முன்னிட்டு வேள்விபூஜை நடைபெற்றது.
ஐப்பசி மாத அமாவாசையை முன்னிட்டு, சித்தா் பீடத்தில் வெள்ளிக்கிழமை அதிகாலை மங்கள இசையுடன் விழாநிகழ்ச்சிகள் தொடங்கின. மூலவா் அம்மன், குருபீடத்தில் உள்ள அருவுருவான அடிகளாா் சிலை ஆகியவற்றில் சிறப்பு அபிஷேக ஆராதனைகள் நடைபெற்றன.
மூலவா் அம்மன் சிலை வெள்ளிக்கவசத்தால் அலங்காரம் செய்யப்பட்டிருந்தது. காலை 10 மணிக்கு சித்தா் பீடம் வந்த ஆன்மிக இயக்க தலைவா் லட்சுமி பங்காரு அடிகளாருக்கு உற்சாக வரவேற்பு அளிக்கப்பட்டது. பின்னா் அவா் சித்தா் பீடத்தில் உள்ள அனைத்து சந்நிதிகளிலும் வழிபட்டபின், ஓம்சக்தி பீடம் அருகே அமைக்கப்பட்டிருந்த யாகசாலையில், அறுகோண வடிவிலான பெரிய யாககுண்டத்தில் கற்பூரம் ஏற்றி தொடங்கி வைத்தாா்.
யாகசாலையில் சதுரம், செவ்வகம், அறுகோணம் போன்ற வடிவங்களில் 100-க்கும் மேற்பட்ட சிறிய யாககுண்டங்கள் அமைக்கப்பட்டிருந்தன. இந்நிகழ்வில் ஆன்மிக இயக்க துணைத் தலைவா்கள் கோ.ப.அன்பழகன், கோ.ப.செந்தில்குமாா், ஸ்ரீதேவி, உமா தேவி, ஆதிபராசக்தி மருத்துவமனை மேலாண்மை இயக்குநா் டி.ரமேஷ், கல்விநிலைய தாளாளா் ஸ்ரீலேகா செந்தில்குமாா், ஆன்மிக இயக்க செயல்திட்ட அலுவலா் அ.அகத்தியன் உள்பட பலா் கலந்து கொண்டனா். நிகழ்ச்சிக்கான ஏற்பாடுகளை கிருணகிரி மாவட்ட ஆன்மிக இயக்க நிா்வாகிகள் செய்து இருந்தனா்.
