ரூபாய் மதிப்பு கடும் சரிவு!

அமெரிக்க டாலருக்கு நிகரான ரூபாய் மதிப்பு இதுவரை இல்லாத அளவுக்கு இன்று (நவ. 14) சரிவைச் சந்தித்தது.

வெளிநாட்டு நிதி வெளியேற்றம் மற்றும் அமெரிக்க நாணய மதிப்பு உயர்வு ஆகியவற்றின் காரணமாக ரூபாய் மதிப்பு சரிந்துள்ளது.

டாலருக்கு நிகரான ரூபாய் மதிப்பு இன்று 2 காசுகள் குறைந்து 84.41 ஆக நிர்ணயிக்கப்பட்டுள்ளது. இன்று காலை வணிக நேரத் தொடக்கத்தின்போது 84.40 காசுகள் என்ற அதிகபட்ச சரிவைக் கண்டது.

நிலையான பணவீக்கம் மற்றும் வெளிநாட்டு முதலீடுகளின் தொடர் வெளியேற்றம் ஆகியவை ரூபாய் மதிப்பு சரிவதற்கு காரணங்களாக நிபுணர்கள் கருதுகின்றனர்.

பங்குச் சந்தை நிலவரம்

மும்பை பங்குச்சந்தை குறியீட்டு எண் செக்செக்ஸ் 110.64 புள்ளிகள் சரிந்து 77,580.31 புள்ளிகளாக வணிகம் நிறைவு பெற்றது. மொத்த வணிகத்தில் இது 0.14 சதவீதம் சரிவாகும்.

தேசிய பங்குச்சந்தை குறியீட்டு எண் நிஃப்டி 26.35 புள்ளிகள் சரிந்து 23,532.70 புள்ளிகளாக நிறைவு பெற்றது. இது மொத்த வணிகத்தில் 0.11 சதவீதம் சரிவாகும்.

சென்செக்ஸ் பட்டியலி உள்ள 30 தரப் பங்குகளில் 10 நிறுவனங்களின் பங்குகள் மட்டுமே உயர்வுடன் இருந்தன. மீடியா, ரியாலிட்டி, துறை பங்குகள் ஓரளவு ஏற்றம் கண்டன.