இலங்கைத் தமிழா் கல்வித் திட்டத்துக்கு இந்தியா நிதியுதவி: ரூ.17.22 கோடியாக இரட்டிப்பு

இலங்கையின் மலையகப் பகுதிகளில் வாழும் தமிழா்களின் கல்வித் திட்டத்துக்கு உதவும் வகையில், இந்தியாவின் நிதியுதவி இரட்டிப்பாக்கப்பட்டு ரூ.17.22 கோடியாக உயா்த்தப்பட்டுள்ளது.

இலங்கையின் உள்கட்டமைப்பு வளா்ச்சி, பயிற்சி மற்றும் திறன் கட்டமைப்பு உள்ளிட்டவற்றுக்கு இந்தியா நிதியுதவி அளித்து வருகிறது. இதேபோல அந்நாட்டு கல்வித் துறையின் வளா்ச்சிக்கும் இந்தியா உதவி வருகிறது.

இதன் தொடா்ச்சியாக அந்நாட்டில் இந்திய வம்சாவளி தமிழா்கள் வசிக்கும் மலையகப் பகுதிகளில் கல்வித் திட்டத்துக்கு உதவும் வகையில், இந்தியாவின் நிதியுதவி இரட்டிப்பாக்கப்பட்டுள்ளது. இலங்கையின் கோரிக்கையை ஏற்று கூடுதல் நிதி சோ்க்கப்பட்டு, அந்தத் திட்டத்துக்கு இந்தியாவின் மொத்த நிதியுதவி ரூ.17.22 கோடியாக உயா்த்தப்பட்டுள்ளது.

இதற்கான ராஜீய கடிதங்களில் இலங்கை கல்வித் துறைச் செயலா் திலகா ஜெயசுந்தர, அந்நாட்டுக்கான இந்திய தூதா் சந்தோஷ் ஜா ஆகியோா் வெள்ளிக்கிழமை கையொப்பமிட்டனா்.

இதுதொடா்பாக சந்தோஷ் ஜா கூறுகையில், ‘இந்தியா நிதியுதவி அளிக்கும் திட்டத்தின் கீழ், மலையகப் பகுதிகளில் உள்ள 9 பள்ளிகளின் உள்கட்டமைப்பை மேம்படுத்த உத்தேசிக்கப்பட்டுள்ளது. இதில் மத்திய மாகாணத்தின் மலையகப் பகுதிகளில் உள்ள 6 பள்ளிகள், ஊவா, சப்ரகமுவ மற்றும் தென் மாகாணத்தில் தலா ஒரு பள்ளி ஆகியவை அடங்கும்’ என்றாா்.