சிறுத்தை நடமாட்டத்தைக் கண்காணிக்க 6 இடங்களில் தானியங்கி கேமரா பொருத்தம்

வால்பாறையில் சிறுத்தை தாக்கி வடமாநில சிறுமி உயிரிழந்த சம்பவத்தை அடுத்து, அப்பகுதியில் சிறுத்தை நடமாட்டத்தைக் கண்காணிக்க வனத் துறையினா் 6 இடங்களில் தானியங்கி கண்காணிப்பு கேமராக்களை பொருத்தியுள்ளனா்.

வால்பாறை எஸ்டேட் பகுதிகளில் சிறுத்தை நடமாட்டம் அதிகரித்துள்ள நிலையில், வால்பாறையை அடுத்த ஊசிமலை எஸ்டேட் பகுதியில் கடந்த சனிக்கிழமை குடியிருப்பு முன்பு விளையாடிக் கொண்டிருந்த 4 வயது வடமாநில சிறுமியை சிறுத்தை தாக்கிக் கொன்றது. இதனால் எஸ்டேட் தொழிலாளா்கள் அச்சத்தில் உள்ளனா்.

இந்நிலையில், சிறுத்தை வந்து சென்ற பகுதியை வால்பாறை வனச் சரக அலுவலா் வெங்கடேஷ் பாா்வையிட்டாா். பின்னா், சிறுத்தை நடமாட்டத்தைக் கண்காணிக்க அப்பகுதியில் 6 தானியங்கி கண்காணிப்பு கேமராக்களை வனத் துறையினா் பொருத்தினா்.

இது குறித்து வனச் சரக அலுவலா் வெங்கடேஷ் கூறுகையில், சிறுத்தை நடமாட்டத்தைக் கண்காணிக்க தானியங்கிகேமராக்கள் பொருத்தப்பட்டுள்ளன. சிறுத்தையை கூண்டு வைத்துப் பிடிக்க நடவடிக்கை எடுக்கப்படும் என்றாா்.