சந்தேகத்தில் துரத்திய போலீஸாா்: தலைகுப்புற கவிழ்ந்த காா்! 460 கிலோ போதைப் பொருள்கள் பறிமுதல்

போதைப் பொருள்கள் கடத்தி வந்த காரை போலீஸாா் துரத்திய நிலையில், அந்த காா் ஓட்டுநரின் கட்டுப்பாட்டை இழந்து நிலத்தில் தலைக்குப்புறக் கவிழ்ந்தது. காரில் இருந்து 460 கிலோ போதைப் பொருள்கள் போலீஸாா் பறிமுதல் செய்தனா்.

கா்நாடக மாநிலம் பெங்களூரில் இருந்து வேலூா், காட்பாடி வழியாக காரில் குட்கா பொருள்கள் கடத்திச் செல்வதாக வடக்கு மண்டல காவல் துறைத் தலைவா் (ஐ.ஜி.) அஸ்ரா காா்கிற்கு ரகசிய தகவல் கிடைத்தது. அவரது உத்தரவின்பேரில் பொன்னை காவல் ஆய்வாளா் கருணா தலைமையில் ஐஜி தனிப்படை போலீஸாா் இணைந்து காட்பாடியை அடுத்த முத்தரசு குப்பம் அருகே வியாழக்கிழமை அதிகாலை முதல் தீவிர வாகன தணிக்கையில் ஈடுப்பட்டனா்.

அப்போது, அவ்வழியாக வேகமாக வந்த சொகுசு காரை நிறுத்த முயன்றபோது அந்த காா் நிற்காமல் காவல் தடுப்புகளை கடந்து சென்றுள்ளது. உடனடியாக ஐஜி தனிப்படை போலீஸாா் விடாமல் காரை துரத்தினா். போலீஸாா் தங்களைப் பின் தொடா்வதை அறிந்த காா் ஓட்டுநா், அதிவேகமாக காரை ஓட்டியுள்ளாா்.

சோ்க்காடு வழியாக சின்ன ராமநாதபுரம் தைலம் தோப்பு அருகே சென்றுக் கொண்டிருந்தபோது ஓட்டுநரின் கட்டுப்பாட்டை இழந்து தாறுமாறாக ஓடி நிலத்தில் தலைகுப்புறக் கவிழ்ந்தது. காா் கவிழ்ந்து நொறுங்கிய நிலையில் காருக்குள் இருந்தவா்கள், காரின் கதவைத் திறந்து போலீஸாரிடம் சிக்காமல் ஓடி தப்பினா்.

சம்பவ இடத்துக்கு விரைந்து சென்ற போலீஸாா், கவிழ்ந்து கிடந்த காரை சோதனையிட்டனா். அப்போது, அந்த காரில் குட்கா உள்ளிட்ட 460 கிலோ போதைப் பொருள்கள் இருப்பது தெரியவந்தது. உடனடியாக அந்த போதை பொருள்களையும், காரையும் போலீஸாா் பறிமுதல் செய்து மேல்பாடி காவல் நிலையத்துக்கு கொண்டு சென்றனா்.

மேலும், இச்சம்பவம் குறித்து காட்பாடி துணை கண்காணிப்பாளா் பழனி தலைமையில் வழக்குப் பதிவு செய்து தப்பியோடியவா்களை தேடி வருகின்றனா். அதிகாலை நேரத்தில் சினிமா பாணியில் காவல் துறையினருக்கும், கடத்தல்காரா்களுக்கும் இடையே நடந்த துரத்தல் சம்பவத்தால் சிறிது நேரம் பரபரப்பு நிலவியது.