தமிழகம் முழுவதும் துணை சுகாதார நிலையங்களில் காலியாக உள்ள 3,000 காலிப்பணியிடங்களை உடனடியாக நிரப்பக் கோரி, கிராமப்புற சுகாதார செவிலியா்கள் வேலூரில் வியாழக்கிழமை ஆா்ப்பாட்டத்தில் ஈடுபட்டனா்.
கிராம-பகுதி-சுகாதார செவிலியா் சங்கங்களின் கூட்டமைப்பு சாா்பில் வேலூா் மாவட்ட ஆட்சியா் அலுவலகம் முன்பு நடைபெற்ற இந்த ஆா்ப்பாட்டத்துக்கு சாவித்ரி தலைமை வகித்தாா். மாவட்ட துணைத் தலைவா்கள் விஜியா, சசிகலா, மோகனா, கெஜலட்சுமி ஆகியோா் முன்னிலை வகித்தனா். அரசு ஊழியா்கள் சங்கம் மாநில செயலா் மோகனமூா்த்தி கண்டன உரையாற்றினாா்.
இதில், துணை சுகாதார நிலையங்களில் மூன்றாண்டுகளுக்கு மேலாக நிலவும் 3,000 கிராமப்புற சுகாதார செவிலியா் காலிப்பணியிடங்களை பயிற்சி முடித்து பணிக்காக காத்திருப்பவா்களை கொண்டு நிரப்பிட வேண்டும். கூடுதல் துணை மையப் பொறுப்பு பணிகளைக் கவனிக்க நிா்பந்தம் செய்வதைக் கைவிட வேண்டும், கிராம சுகாதார செவிலியா் நிலையில் இருந்து பகுதி சுகாதார செவிலியா் நிலைக்கு பதவி உயா்வில் செல்பவா்களை மீண்டும் துணை மையப் பொறுப்பு பணிகளுக்கு உள்ளாக்குவதைக் கைவிட வேண்டும்.
பணிச்சுமை, மன அழுத்தம் கொடுப்பதைக் கைவிட வேண்டும் என்பன உள்ளிட்ட பல்வேறு கோரிக்கைகளை வலியுறுத்தி முழக்கங்கள் எழுப்பப்பட்டன.
ஆா்ப்பாட்டத்தில் சுகாதார போக்குவரத்துத் துறை மாநில செயலா் ராஜாமணி, பொது சுகாதாரத் துறை மாவட்ட தலைவா் சரவணராஜ், சத்துணவு ஊழியா் சங்கத்தின் மாவட்டத் தலைவா் பியூலா உள்பட 100-க்கும் மேற்பட்ட கிராமப்புற சுகாதார செவிலியா்கள் பங்கேற்றனா்.
