செல்போனில் விடியோ பார்த்துக் கொண்டே சென்ற மாணவர்கள் மீது ரயில் மோதி ஒருவர் பலி

வாழப்பாடி: வாழப்பாடி அருகே ரயில் தண்டவாளத்தில் செல்போனில் விடியோ கேம் பார்த்துக் கொண்டே நடந்து சென்ற பள்ளி மாணவர்கள் மீது சேலம் - விருத்தாசலம் பாசஞ்சர் ரயில் மோதியதில் ஒருவர் சம்பவ இடத்திலேயே பலியானார், மற்றொருவர் ஆபத்தான நிலையில் மருத்துவமனையில் அனுமதிக்கப்பட்டு சிகிச்சை பெற்று வருகிறார்.

சேலம் மாவட்டம் வாழப்பாடி அருகே உள்ள புத்தர் கவுண்டன் பாளையத்தைச் சேர்ந்த பள்ளி மாணவர்கள் இரண்டு பேர் ரயில் தண்டவாளத்தில் செல்போனில் விடியோ கேம் பார்த்துக்கொண்டே நடந்து சென்றுள்ளனர். அப்போது சேலத்தில் இருந்து விருத்தாசலம் நோக்கி வந்த பாசஞ்சர் ரயில் மோதி இரண்டு பேரும் தூக்கி வீசப்பட்டனர். இதில் புத்திர கவுண்டன் பாளையம் பகுதியைச் சேர்ந்த குமார் மகன் தினேஷ் சம்பவ இடத்திலேயே பலியானார்.

இதையும் படிக்க |ஒரு வாரத்துக்கு மழைக்கு வாய்ப்பில்லை! ஆனால்..?

அதே பகுதியைச் சேர்ந்த ரவிக்குமார் மகன் அரவிந்த் பலத்த காயங்களுடன் உயிருக்கு ஆபத்தான நிலையில் 108 வாகனம் மூலம் பெத்தநாயக்கன்பாளையம் அரசு மருத்துவமனையில் அனுமதிக்கப்பட்டு சிகிச்சை பெற்று வருகிறார்.

விபத்துக்குள்ளான இருவரும் ஏத்தாப்பூர் அரசு ஆண்கள் மேல்நிலைப் பள்ளியில் 11 ஆம் வகுப்பு படித்து வருகின்றனர்.

இந்த சம்பவம் குறித்து ரயில்வே போலீசார் வழக்குப் பதிவு செய்து விசாரணை மேற்கொண்டு வருகின்றனர்.