சேலம் மத்திய மாவட்ட திமுக சாா்பில் சமத்துவ பொங்கல் விழா: அமைச்சா் ஆா். ராஜேந்திரன் பங்கேற்கிறாா்

சேலம் மத்திய மாவட்ட திமுக சாா்பில் சமத்துவ பொங்கல் விழா 11 ஆம் தேதி முதல் 15 ஆம் வரை கொண்டாடப்படும் என அறிவிக்கப்பட்டுள்ளது.

இதுகுறித்து சேலம் மத்திய மாவட்ட திமுக செயலாளரும், சுற்றுலாத் துறை அமைச்சருமான ஆா். ராஜேந்திரன் வெளியிட்டுள்ள அறிக்கை:

பொங்கல் பண்டிகையை சேலம் மத்திய மாவட்டம் முழுவதும் மாநகரம், ஒன்றியம், பேரூா், ஊராட்சிகளில் திமுக கொடியேற்றி சமத்துவ பொங்கல் விழாவாக கொண்டாட வேண்டும். மேலும், துணை முதல்வா் உதயநிதி ஸ்டாலின் பிறந்தநாள் விளையாட்டுப் போட்டிகள் நடத்தி அதில் வெற்றி பெற்றவா்களுக்கு பரிசுகள் வழங்கியும் பொங்கல் விழாவைக் கொண்டாட வேண்டும்.

இதையொட்டி, வரும் 14-ஆம் தேதி ஓமலூா், சேலம் வடக்கு சட்டப்பேரவைத் தொகுதிகளில் திமுக கொடியேற்றுதல் நிகழ்ச்சி நடைபெறுகிறது. அன்றைய தினம் காலை 9 மணி முதல் மாலை 5 மணி வரை தாரமங்கலம் கிழக்கு ஒன்றிய பகுதியிலும், 15-ஆம் தேதி கன்னங்குறிச்சி பேரூராட்சிக்கு உள்பட்ட அஸ்தம்பட்டி பகுதி, குமாரசாமிப்பட்டி பகுதி, செவ்வாய்ப்பேட்டை, அரிசிபாளையம், பொன்னம்மாபேட்டை மற்றும் ஓமலூா் தெற்கு ஒன்றியம் பகுதியிலும் திமுக கொடியேற்றி விளையாட்டுப் போட்டிகளில் வெற்றி பெற்றவா்களுக்கு பரிசுகள் வழங்கப்படுகின்றன. இதில் அமைச்சா் ஆா்.ராஜேந்திரன், திமுக பேச்சாளா் சரத்பாலா ஆகியோா் பங்கேற்கின்றனா்.

இதே போல, 11-ஆம் தேதி கொண்டலாம்பட்டி, குகை, தாதகாப்பட்டி, மெய்யனூா், சூரமங்கலம், அழகாபுரம், காடையாம்பட்டி கிழக்கு, மேற்கு ஒன்றிய பகுதியிலும், 12-ஆம் தேதி கிச்சிப்பாளையம், அம்மாப்பேட்டை, சேலம் வடக்கு ஒன்றியம், ஓமலூா் வடக்கு, கிழக்கு ஒன்றியம் பகுதிகளிலும் பொங்கல் விழா நடைபெறும் என தெரிவிக்கப்பட்டுள்ளது.