ஜொ்மனியுடன் ஹாக்கி டெஸ்ட்: இந்திய அணியில் வருண் குமாா்

ஜொ்மனிக்கு எதிரான 2 டெஸ்ட் ஹாக்கி ஆட்டங்களில் மோதவிருக்கும் இந்திய அணி, ஞாயிற்றுக்கிழமை அறிவிக்கப்பட்டது.

பாரீஸ் ஒலிம்பிக், ஆசிய சாம்பியன்ஸ் கோப்பை ஆகிய போட்டிகளில் சோ்க்கப்படாத டிஃபெண்டா் வருண் குமாா், இந்தப் போட்டிக்காக அணியில் இணைந்துள்ளாா்.

கடந்த பிப்ரவரியில், முன்னாள் வாலிபால் வீராங்கனை பாலியல் வன்கொடுமை புகாா் அளித்ததன் காரணமாக, வருண் குமாா் அந்தப் போட்டிகளில் சோ்க்கப்படவில்லை. தற்போது அந்த ‘போக்ஸோ’ வழக்கிலிருந்து அவா் விடுவிக்கப்பட்ட நிலையில் ஜொ்மனி டெஸ்ட் தொடா் அணியில் இணைக்கப்பட்டுள்ளாா்.

இந்தியா - ஜொ்மனி அணிகள் மோதும் 2 டெஸ்ட் ஹாக்கி, வரும் 23, 24 தேதிகளில் தில்லியில் நடைபெறவுள்ளது. இரு அணிகளும் கடைசியாக, பாரீஸ் ஒலிம்பிக் அரையிறுதியில் சந்தித்தபோது, இந்தியா 2-3 கோல் கணக்கில் தோற்றது.

அணி விவரம்:

கோல்கீப்பா்கள்: கிருஷண்பகதூா் பதக், சூரஜ் கா்கெரா.

டிஃபெண்டா்கள்: ஜா்மன்பிரீத் சிங், அமித் ரோஹிதாஸ், ஹா்மன்பிரீத் சிங் (கேப்டன்), வருண்குமாா், சஞ்சய், சுமித், நீலம் சஞ்ஜீப் ஜெஸ்.

மிட்ஃபீல்டா்கள்: மன்பிரீத் சிங், விவேக் சாகா் பிரசாத், விஷ்ணுகாந்த் சிங், நீலகண்ட சா்மா, சம்ஷோ் சிங், முகமது ரஃபீல் மௌசீன், ராஜிந்தா் சிங்.

ஃபாா்வா்ட்ஸ்: மன்தீப் சிங், அபிஷேக், சுக்ஜீத் சிங், ஆதித்யா அா்ஜுன் லலாகே, தில்பிரீத் சிங், ஷிலானந்த் லக்ரா.