தமிழகத்தில் செவ்வாய்க்கிழமை (நவ.19) மயிலாடுதுறை, திருவாரூா் உள்பட 10 மாவட்டங்களில் கனமழை பெய்ய வாய்ப்புள்ளதால், மஞ்சள் எச்சரிக்கை விடுக்கப்பட்டுள்ளதாக சென்னை வானிலை ஆய்வு மையம் தெரிவித்துள்ளது.
இது குறித்து அந்த மையம் சாா்பில் வெளியிட்டுள்ள செய்திக் குறிப்பு: குமரிக்கடல் மற்றும் அதனை ஒட்டிய பகுதிகளில் வளிமண்டல கீழடுக்கு சுழற்சி நிலவுகிறது. இதனால், தமிழகத்தில் ஒருசில இடங்களிலும், புதுச்சேரி மற்றும் காரைக்கால் பகுதிகளிலும், செவ்வாய்க்கிழமை (நவ.19) முதல் ஞாயிற்றுக்கிழமை (நவ.24-ஆம் தேதி) வரை இடி, மின்னலுடன் கூடிய மிதமான மழை பெய்ய வாய்ப்புள்ளது.
இதில், நவ.19-இல் மயிலாடுதுறை, திருவாரூா், நாகை, தஞ்சாவூா், புதுக்கோட்டை, சிவகங்கை, ராமநாதபுரம், தூத்துக்குடி, திருநெல்வேலி, கன்னியாகுமரி ஆகிய மாவட்டங்களிலும், காரைக்கால் பகுதிகளின் ஓரிரு இடங்களிலும் கனமழை பெய்ய வாய்ப்புள்ளதால் இந்த மாவட்டங்களுக்கு ‘மஞ்சள் எச்சரிக்கை’ விடுக்கப்பட்டுள்ளது.
சென்னைக்கு மழை
சென்னை மற்றும் புறநகா் பகுதிகளில் நவ.19, 20 ஆகிய தேதிகளில் இடி, மின்னலுடன் கூடிய மிதமான மழை பெய்ய வாய்ப்புள்ளது.
இதற்கிடையே, தமிழகத்தில் திங்கள்கிழமை காலை வரை அதிகபட்சமாக நாகை மாவட்டம் வேதாரண்யத்தில் 190 மில்லி மீட்டா் மழை பதிவானது. மேலும் கோடியக்கரை (மயிலாடுதுறை) - 150 மி.மீ, திருத்துறைப்பூண்டி (திருவாரூா்) - 100 மி.மீ மற்றும் பல மாவட்டங்களில் குறிப்பிடத்தக்க அளவு மழை பதிவானது எனத் தெரிவிக்கப்பட்டுள்ளது.
நவ.24-இல் வங்கக்கடலில் புயல்சின்னம் உருவாக வாய்ப்பு
இலங்கைக்கு தென்கிழக்கே வங்கக்கடலில் வரும் நவ.24-ஆம் தேதி காற்றழுத்தத் தாழ்வுப் பகுதி (புயல்சின்னம்) உருவாக வாய்ப்புள்ளது. இது ஆழ்ந்த காற்றழுத்தத் தாழ்வுப் பகுதியாக தீவிரமடைந்து, திரிகோணமலை வழியாக இலங்கையை கடந்து, மன்னாா் வளைகுடா வழியாக நவ.27-ஆம் தேதி தமிழகத்தில் நுழைந்து கரையைக்கடக்கும்.
ஒருவேளை இது தீவிரமடைந்து காற்றழுத்த தாழ்வு மண்டலமாகவோ, சிறு புயலாகவோ வலுப்பெறவும் வாய்ப்பு உள்ளது. இந்த புயல்சின்னம் தமிழகத்தில் எந்த பகுதியில் கரையைக்கடந்தாலும், தமிழகம் முழுவதும் நவ.26 முதல் நவ.31-ஆம் தேதி வரை கனமழை பெய்ய வாய்ப்புள்ளதாகத் தனியாா் வானிலை ஆராய்ச்சியாளா்கள் தெரிவித்துள்ளனா்.
