திருவள்ளூா் அருகே 1,057 ஆண்டுகள் பழைமையான 3 செப்பேடுகள் கண்டெடுப்பு

திருவள்ளூா் அருகே சிங்கீஸ்வரா் கோயிலில் 1,057 ஆண்டுகள் பழைமையான விஜயநகர பேரரசு காலத்திலான 3 செப்பேடுகள் கண்டெடுக்கப்பட்டதைத் தொடா்ந்து, மத்திய தொல்லியல் துறை அதிகாரிகள் செவ்வாய்க்கிழமை நேரில் ஆய்வு மேற்கொண்டனா்.

திருவள்ளூா் அருகே கடம்பத்தூா் ஊராட்சி ஒன்றியம், மப்பேடு கிராமத்தில் 1,057 ஆண்டுகள் பழைமையான ஆதித்த கரிகால சோழனால் கட்டப்பட்ட ஸ்ரீசிங்கீஸ்வரா் கோயில் உள்ளது. இந்தக் கோயில் 60 ஆண்டுகளுக்கும் மேலாக இந்துசமய அறநிலையத் துறையின் கட்டுப்பாட்டில் இயங்கி வருகிறது.

இந்த நிலையில், ஸ்ரீசிங்கீஸ்வரா் கோயிலின் பொறுப்பு செயல் அலுவலரான து.ரு.பிரகாஷ் அண்மையில் கோயில் வளாகத்தில் உள்ள பாதுகாக்கப்பட்ட இரும்பு பெட்டியில் சோதனை மேற்கொண்டாா்.

அப்போது, விஜயநகர பேரரசின் முத்திரையைக் கொண்ட 3 செப்பேடுகள் கண்டெடுக்கப்பட்டன. இதைத் தொடா்ந்து, செப்பேடுகள் குறித்து திருவள்ளூா் மாவட்ட தொல்லியல் அலுவலா் லோகநாதனின் கவனத்துக்கு கொண்டு சென்றாா். அதில், சம்ஸ்கிருத மொழியில், நந்திநாகரி எழுத்து வடிவில் தகவல்கள் செப்பேடுகளில் எழுதப்பட்டிருந்தன.

அதனால், அந்த செப்பேடுகளின் புகைப்படங்களை கா்நாடக மாநிலம், மைசூருவில் செயல்பட்டு வரும் இந்திய தொல்லியல் துறையின் தென் மண்டல கல்வெட்டுப் பிரிவுக்கு மாவட்ட தொல்லியல் அலுவலா்கள் அனுப்பி வைத்தனா்.

இந்த நிலையில், அந்த செப்பேடுகளின் புகைப்படங்களை ஆய்வு செய்த இந்திய தொல்லியல் துறையின் தென் மண்டல கல்வெட்டுப் பிரிவின் இயக்குநா் கே.முனிரத்தினம் உத்தரவின்பேரில், மத்திய தொல்லியல் துறை செப்பேடுகள் புகைப்படங்களின் துணைக் கண்காணிப்பாளா் இயேசு பாபு, உதவி கண்காணிப்பாளா் கிருஷ்ணமூா்த்தி, கல்வெட்டு பதிவு எடுக்கும் அலுவலா் யுவராஜ் ஆகியோா் மப்பேடு கிராமத்தில் உள்ள சிங்கீஸ்வரா் கோயிலில் உள்ள செப்பேடுகளை ஆய்வு மேற்கொண்டனா்.

இந்த ஸ்ரீசிங்கீஸ்வரா் கோயிலில் கண்டெடுக்கப்பட்டுள்ள செப்பேடுகள், 1,513-ஆம் ஆண்டு விஜயநகர பேரரசைச் சோ்ந்த கிருஷ்ண தேவராய மன்னன் காலத்தைச் சோ்ந்தது. இவை, 4 பிராமணா்களுக்கு அரசரால் நிலங்கள் தானமாக அளித்துள்ளதை இந்த செப்பேடுகள் குறிப்பிடுகிறது.

மேலும், இந்த செப்பேடுகளின் முழு விவரங்கள் முழுவதுமாக ஆய்வு செய்த பின்னரே, அதில் உள்ள தகவல்கள் தெரியவரும் என அதிகாரிகள் தெரிவித்தனா்.

அப்போது மப்பேடு ஸ்ரீசிங்கீஸ்வரா் கோயிலில் கண்டெடுக்கப்பட்டுள்ள 16-ஆம் நூற்றாண்டைச் சோ்ந்த 3 செப்பேடுகளை தொல்லியல் துறை ஆய்வு செய்த பின்பு, அந்த செப்பேடுகளை கிராமத்தின் வரலாற்றை வருங்கால சந்ததியினா் அறிந்து கொள்ளும் வகையில் கோயில் உள்ளே வைத்து பாதுகாக்கவும் வேண்டுமென கிராம மக்கள் அரசுக்கு கோரிக்கை விடுத்துள்ளனா்.

இந்த ஆய்வின்போது இந்து சமய அறநிலையத் துறை செயல் அலுவலா் து.ரு.பிரகாஷ், அா்ச்சகா் சங்கா், அறநிலையத் துறை கணக்கா் க.முருகன் மற்றும் திருக்கோயில் பணியாளா்கள் உடனிருந்தனா்.