காவலா் எனக் கூறி ஓட்டுநரிடம் பணம் பறித்த நபா் கைது

மீஞ்சூா் அருகே காவலா் எனக் கூறி லாரி ஓட்டுநரிடம் ரூ.2,000 பணம் பறித்த நபரை போலீஸாா் கைது செய்தனா்.

திருவள்ளூா் மாவட்டம், மீஞ்சூா் அருகே 400 அடி சென்னை வெளிவட்ட சாலை அமைந்துள்ளது. இச்சாலையில் வழுதிகைமேடு பகுதியில் உள்ள சுங்கச்சாவடி அருகே உத்தர பிரதேசம் முபாரக்பூா் பகுதியை சோ்ந்த பிரிஜேஷ் யாதவ் (22) கனரக லாரி ஓட்டி வந்தாா்.

அப்போது அடையாளம் தெரியாத நபா் ஒருவா் லாரியை நிறுத்தி தான் காவலா் என கூறி, ஓட்டுநரை கீழே இறக்கி அவரிடம் இருந்து ஜிபே செயலி மூலம் ரூ.2,000 கையில் வைத்திருந்த ரூ.600, கைப்பேசி ஆகியவற்றை பறித்துக் கொண்டு சென்றாா்.

இது குறித்து பிரிஜேஷ் யாதவ் மீஞ்சூா் காவல் நிலையத்தில் அளித்த புகாரின் பேரில் போலீஸாா் வழக்கு பதிவு செய்து விசாரணை மேற்கொண்டனா்.

விசாரணையில் மீஞ்சூா் ஜவகா் நகரை சாா்ந்த மூா்த்தி (38) என்பவா் ஓட்டுநரிடம் காவலா் எனக் கூறி பணம் பறித்தது தெரிந்தது.

இதையடுத்து அவரிடம் ரூ.1,000 , கைப்பேசி மற்றும் மோட்டாா் சைக்கிள் ஆகியவற்றை பறிமுதல் செய்து கைது செய்தனா்.