"நான் வாழாவெட்டியா இருக்க வேணா.." - மாமியார் கொடுமை பற்றி ஆடியோ அனுப்பி தற்கொலை செய்த இளம் பெண்

கோவை கோயில்பாளையம் சக்தி பிரதானச்சாலை பகுதியைச் சேர்ந்தவர் பாபு. இவரது மகள் சுருதி பாபு (24). சுருதி பாபுவுக்கும் கன்னியாகுமரி மாவட்டம் சுசீந்திரம் பகுதியைச் சேர்ந்த கார்த்திக் என்பவருக்கும் கடந்த ஏப்ரல் மாதம் 21-ம் தேதி திருமணம் நடந்தது.

கொட்டாரம் மின்சார வாரியத்தில் கார்த்திக் வேலை செய்துவருகிறார். இவர்களுக்குத் திருமணம் ஆகி 6 மாதங்களே ஆன நிலையில், நேற்று (அக்டோபர் 22) அவர் தூக்கில் தொங்கிய நிலையில் பிணமாக மீட்கப்பட்டார். தனது மாமியார் செண்பகவல்லி தன்னை வெளியிடங்களுக்குப் போகக்கூடாது எனவும், கணவர் சாப்பிட்ட பின்புதான் சாப்பிட வேண்டும் எனவும் கூறி தொடர்ந்து மன உளைச்சல் ஏற்படுத்தி வந்ததாக சுருதிபாபு பெற்றோரிடம் வாட்ஸ் அப் காலில் பேசியிருக்கிறார்.

இந்நிலையில் சுருதிபாபுவை வீட்டுக்கு அழைத்துச் செல்லப் பெற்றோர் புறப்பட்டு வந்த சமயத்தில் அவர் தற்கொலை செய்துகொண்ட தகவல் கிடைத்ததாகச் சுருதி பாபுவின் பெற்றோர் சுசீந்திரம் காவல் நிலையத்தில் புகார் அளித்தனர். இதன் அடிப்படையில் காவல்துறையினர் சுருதி பாபுவின் உடலை மீட்டு ஆசாரிப்பள்ளம் மருத்துவக் கல்லூரி மருத்துவமனைக்குப் பிரேதப் பரிசோதனைக்காக அனுப்பி வைத்தனர். திருமணம் நடந்து ஆறு மாதங்களே ஆவதால் ஆர்.டி.ஓ விசாரணைக்கும் உத்தரவிடப்பட்டுள்ளது.

இதற்கிடையே சுருதிபாபு அழுதுகொண்டே கணவரின் தாய் குறித்துப் பேசும் ஆடியோ ஒன்று வெளியாகி உள்ளது. அதில் சுருதிபாபு கூறியுள்ளதாவது:

ரொம்ப சாரிம்மா. தயவு செய்து அவரை எதுவுமே சொல்லாதீங்க. மறுபடியும் என்னை வீட்டை விட்டு போகச் சொன்னாங்க. அப்பா வீட்டுல கொண்டு போய் விடுவதாகச் சொன்னாங்க. எங்க வீட்ல கொண்டு விட்டால் நான் செத்துப் போவேன்னு சொன்னேன். அவங்க பிடிச்சபிடியா இருக்காங்க. நான் செத்தால் என் பிள்ளைக்கு வேறு யாரும் இல்லை. உனக்கு வேறு குடும்பம் இருக்கிறது என மாமியார் சொன்னாங்க. என்னை கொண்டுபோய் என் வீட்டில் விட்டுவிடு என்றார்கள். வாழாவெட்டியாக இருப்பதில் எனக்கு விருப்பம் இல்லை. அவருக்கும் (கணவருக்கும்) எனக்கும் இந்நாள் வரைக்கும் ஒரு பிரச்னையும் ஆனதில்லை. இவங்களாலதான் பிரச்னை. என் புருஷன் பக்கத்தில நான் உட்காரக்கூடாது. பக்கத்தில உக்காந்து சாப்பிடக்கூடாது. எச்சில் தட்டை எடுத்து சாப்பிடணும்.

என்னை மன்னிச்சிரும்மா... என் நகை எல்லாம் ரெண்டு டப்பாவில இருக்கு. அந்த ரெண்டு டப்பாவையும் அவர்கிட்ட கொடுக்கச் சொல்லியிருக்கிறேன். உங்ககிட்ட கொடுத்திருவார். தயவு செய்து வாங்கிக்கோங்க. தமிழ்நாட்டு கலாச்சாரப்படி என்னை இறுதிச்சடங்கு பண்ண வந்தாங்கன்ன அது தேவையில்ல. தயவுசெய்து அப்பிடி பண்ண விட்டுராதீங்க. அவங்க கல்சர்ல எதுவும் நடக்கக்கூடாது. கோயம்புத்தூர்ல கூட்டிட்டு போங்க, இல்ல இங்கேயே பண்ணுங்க. எலக்ட்ரிக்கல் இதுலபோய் சுவிட் ஆன் பண்ணுங்க போதும். இவங்க சொல்றபடி ஒரு மண்ணும் பண்ணி கிழிக்க வேணாம். அம்மா, யோயோ-க்க கல்யாணத்துக்கு எதாவது பண்ணணும்னு இருந்ததுமா. நான் இல்லன்னா என்னோட நகையில எதாவது ஒன்னு அவளுக்குக் கொடுத்திருங்க. அவளைக் கொஞ்சம் பாத்துக்கோங்க. சாரிம்மா, நான் வாழாவெட்டியா இருக்க வேணாம்மா. திரும்பவும் என்னை வீட்டவிட்டு வெளிய போன்னு சொன்னாங்க. அதனாலதான் போறேன்.

இவ்வாறு அந்த ஆடியோவில் சுருதி பாபு உருக்கமாகப் பேசியிருந்தார்.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்...https://tinyurl.com/crf99e88

வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்...https://tinyurl.com/crf99e88