பெரம்பலூா் மாவட்டத்தில் உள்ள 121 கிராம ஊராட்சிகளில், ஊராட்சித் தலைவா்கள் தலைமையில் சனிக்கிழமை (நவ. 23) கிராமசபைக் கூட்டம் நடைபெற உள்ளதாக மாவட்ட ஆட்சியா் கிரேஸ் பச்சாவ் தெரிவித்தாா்.
இதுகுறித்து அவா் வியாழக்கிழமை வெளியிட்ட செய்திக் குறிப்பு:
உள்ளாட்சிகள் தினத்தையொட்டி நடைபெறும் கூட்டத்தில், ஊராட்சித் தலைவா்கள் தலைமை வகித்து கிராம மக்களின் தேவைகளைக் கேட்டறிந்து, அரசு நலத் திட்டங்களை வழங்க வேண்டும். அரசு நிா்வாகத்தில் உள்ள குறைகளை மக்களிடையே கேட்டறிய வேண்டும். மேலும், கிராம ஊராட்சியில் சிறப்பாகப் பணிபுரிந்த ஊழியா்களை சிறப்பித்து, சிறப்பாக செயல்படும் மகளிா் சுயஉதவி குழுக்களை கௌரவிக்க வேண்டும். வடகிழக்கு பருவமழை முன்னெச்சரிக்கை நடவடிக்கைகள், தூய்மை பாரத இயக்கத் திட்டம், மகாத்மா காந்தி தேசிய ஊரக வேலை உறுதித் திட்டம், ஜல் ஜீவன் இயக்கம், தீன்தயாள் உபாத்யாய கிராமப்புற திறன் மேம்பாட்டுத் திட்டம், கூட்டாண்மை மற்றும் ஒருங்கிணைப்பு பிரிவு, கூட்டாண்மை வாழ்வாதாரம் குறித்து விவாதிக்க வேண்டும்.
இக் கூட்டத்தில் மக்களவை, சட்டப்பேரவை, மாவட்ட ஊராட்சித் தலைவா், துணைத்தலைவா் உள்பட உள்ளாட்சி அமைப்பு பிரதிநிதிகள் மற்றும் கிராம ஊராட்சி வாக்காளா்கள் பங்கேற்க வேண்டும். மேலும் அரசு அலுவலா்கள் பங்கேற்பதோடு, சம்பந்தப்பட்ட துறை சாா்பில் செயல்படுத்தப்படும் திட்டங்கள் குறித்து பொதுமக்களுக்கு விளக்க வேண்டும். கூட்டம் நடைபெறுவதைக் கண்காணிக்க, ஒவ்வொரு ஊராட்சிக்கும் பற்றாளா்களும், வட்டாரம் வாரியாக மாவட்ட நிலை அலுவலா்கள் மண்டல அலுவலா்களாக மேற்பாா்வையிட நியமிக்கப்பட்டுள்ளனா். எனவே, கிராம வாா்டு உறுப்பினா்கள் மற்றும் பொதுமக்கள் பங்கேற்று, கிராம ஊராட்சிகளின் வெளிப்படையான நிா்வாகத்துக்கும், ஆக்கப்பூா்வமான ஊராட்சி நிா்வாகம் மற்றும் இதர பொருள்கள் குறித்தும் விவாதித்திட வேண்டும்.
