``மான்களை வேட்டையாடவில்லை.. செய்யாத தவறுக்கு மன்னிப்பு கேட்கமுடியாது'' - சல்மான் கான் தந்தை விளக்கம்

பாலிவுட் நடிகர் சல்மான் கான் 1998ம் ஆண்டு ராஜஸ்தானுக்கு படப்பிடிப்புக்கு சென்றபோது அபூர்வ வகை மான்களை வேட்டையாடியதாக குற்றம்சாட்டப்பட்டது. சம்பவம் நடந்து 25 ஆண்டுகள் ஆகிவிட்ட நிலையில் இது இன்னும் சல்மான் கானை துரத்திக்கொண்டிருக்கிறது. சல்மான் கான் வேட்டையாடியதாக கூறப்படும் அபூர்வ வகை மான்களை பிஷ்னோய் இன மக்கள் தெய்வமாக வழிபடுவதாக கூறப்படுகிறது. எனவே சல்மான் கான் மன்னிப்பு கேட்க வேண்டும் என்று குஜராத் சிறையில் இருக்கும் மாபியா லாரன்ஸ் பிஷ்னோய் கோரிக்கை விடுத்துள்ளார்.

இதற்காக சல்மான் கானுக்கு பலமுறை கொலை மிரட்டலும் விடுத்துள்ளார். தற்போது லாரன்ஸ் பிஷ்னோய் கூட்டாளிகள் சல்மான் கானின் நெருங்கிய நண்பர் பாபா சித்திக்கை மும்பையில் கொலை செய்துள்ளனர்.

இதனால் இப்பிரச்னைக்கு முற்றுப்புள்ளி வைக்க சல்மான் கான் மன்னிப்பு கேட்கலாம் என்ற ஒரு கருத்து எழுந்துள்ளது. இது தொடர்பாக சல்மான் கானின் முன்னாள் காதலி என்று கூறப்படும் நடிகை சோமி அலியும் சல்மான் கானிடம் கோரிக்கை விடுத்துள்ளார். பா.ஜ.க எம்.பி. ஒருவரும் சல்மான் கான் மன்னிப்பு கேட்டு இப்பிரச்னைக்கு முற்றுப்புள்ளி வைக்கவேண்டும் என்று தெரிவித்துள்ளார்.

சமீபத்தில் 5 கோடி ரூபாய் கொடுத்து பகையை தீர்த்துக்கொள்ளும்படி சல்மான் கானுக்கு கொலை மிரட்டல் விடுக்கப்பட்டு இருந்தது. ஆனால் மன்னிப்பு கேட்கும் பேச்சுக்கே இடமில்லை என்று சல்மான் கானின் தந்தை சலீம் கான் தெரிவித்துள்ளார்.

இது தொடர்பாக சலீம் கான் அளித்த பேட்டியில்,''எனது மகனிடம் உண்மையில் மான்களை வேட்டையாடியது யார் என்று கேட்டேன். அப்போது தான் மான்களை வேட்டையாடவில்லை என்றும், சம்பவ இடத்திலேயே தான் இல்லை என்றும் தெரிவித்தான். சம்பவம் நடக்கும்போது அங்கிருந்த காரில் கூட தான் இல்லை என்று என்னிடம் தெரிவித்தான். எனது மகன் என்னிடம் பொய் சொல்லமாட்டான். சல்மான் கான் விலங்குகளை கொல்லக்கூடியவர் கிடையாது. மாறாக விலங்குகள் மீது அன்பு செலுத்தக்கூடியவர். ஒரு கரப்பான் பூச்சியைக்கூட சல்மான் கான் கொன்றது கிடையாது. மன்னிப்பு கேட்பது என்பது குற்றத்தை ஒப்புக்கொண்டதாகும். சல்மான் கான் எந்த விலங்கையும் கொல்லவில்லை''என்று தெரிவித்தார்.

இதற்கிடையே பலத்த கொலை மிரட்டலுக்கிடையே சல்மான் கான் தனது பிக்பாஸ் படப்பிடிப்பை தொடங்கி இருக்கிறார். பிக்பாஸ் படப்பிடிப்பு நடைபெறும் இடத்தில் கூடுதலாக 60 பாதுகாவலர்கள் நியமிக்கப்பட்டு பாதுகாப்பு பலப்படுத்தப்பட்டுள்ளது.