நடிகர் ஆர்ஜே பாலாஜியின் சொர்கவாசல் படத்தின் டீசர் ரசிகர்களிடம் வரவேற்பைப் பெற்றுள்ளது.
ஆர்ஜேவாக இருந்து நடிகராக மாறியவர் ஆர்ஜே பாலாஜி. நடிகராக மட்டுமில்லாமல் இயக்குநராகவும் இருக்கிறார். நயன்தாராவை வைத்து இயக்கிய மூக்குத்தி அம்மன் வெற்றி பெற்றது. அடுத்ததாக, நடிகர் சூர்யாவின் 45-வது படத்தை இயக்க உள்ளார்.
இதற்கிடையே, அறிமுக இயக்குநர் சித்தார்த் விஸ்வநாத் இயக்கத்தில் சொர்கவாசல் என்கிற படத்தில் நடித்திருந்தார். மத்திய சிறைச்சாலையை மையமாக வைத்து 1999-ல் நடக்கும் கதையாக இப்படம் உருவாகியுள்ளது.
இதில், செல்வராகவன், கருணாஸ், பாலாஜி சக்திவேல், எழுத்தாளர் சோஷா சக்தி உள்ளிட்டோர் நடித்துள்ளனர்.
சில நாள்களுக்கு முன், சொர்கவாசல் படத்தின் டீசர் வெளியானது. இதில், இடம்பெற்ற சென்னை மத்திய சிறையிலிருக்கும் கைதிகள் மற்றும் சிறைக் காவலர்களுக்கு இடையான காட்சிகள் பெரிய வரவேற்பைப் பெற்றுள்ளன.
இதையும் படிக்க: டார்ஸான் தொடர் ஹாலிவுட் நடிகர் காலமானார்!
குறிப்பாக, படத்தின் எடிட்டர் செல்வா ஆர்கே-ன் டீசர் காட்சி இணைப்புகளும் வடிவமைப்பும் படத்தின் மீதான ஆவலை அதிகரிக்கச் செய்துள்ளன. இதுவரை, யூடியூப்பில் இந்த டீசர் 4 மில்லியன் பார்வைகளைக் கடந்துள்ளது.
