ரூ.40 கோடியில் காஞ்சிபுரம் மஞ்சள் நீா் கால்வாய் மேம்பாடு

சி.வ.சு.ஜெகஜோதி

காஞ்சிபுரம் மாநகரின் மையப்பகுதியில் செல்லும் மஞ்சள் நீா் கால்வாய் ரூ.40 கோடியில் மேம்படுத்தி, நீா் மாசுபடாமல் தடுக்கவும், கழிவுகள் கலப்பதை தடுக்க கான்கிரீட் சுவா், அமைக்கும் பணிகள் தீவிரமாக நடைபெற்று வருகின்றன.

காஞ்சிபுரம் மாநகராட்சி 51 வாா்டுகளை உள்ளடக்கியதாக அமைந்துள்ளது. நகரின் மையப்பகுதியில் சுமாா் 5.80 கி.மீ தொலைவுக்கு செல்கிறது மஞ்சள் நீா் கால்வாய். கோயில் நகரம், பட்டு நகரம் என பெயா் பெற்ற காஞ்சிபுரத்துக்கு நாள்தோறும் ஆயிரக்கணக்கானோா் வந்து செல்கின்றனா்.

இத்தகைய பெருமைக்குரிய காஞ்சிபுரத்தின் மையப்பகுதியில் மஞ்சள் நீா் கால்வாய் அமைந்திருப்பதால் வெளியேறும் கழிவுநீா் இக்கால்வாய் வழியாக நத்தப்பேட்டை ஏரியில் சென்றடைகிறது. புத்தேரி ஊராட்சியில் தொடங்கி நகரின் முக்கியப் பகுதிகள் வழியாக நத்தப்பேட்டை ஏரிக்கு செல்கிறது. இந்த ஏரியில் கழிவு நீா் கலந்து நீா் மாசடைந்து நத்தப்பேட்டை ஏரியும் பாதிக்கப்படுவதாக தமிழ்நாடு விவசாயிகள் சங்க மாவட்ட செயலாளா் கே.நேருவும் அண்மையில் மாநகராட்சி ஆணையரிடம் மனு அளித்திருந்தாா்.

இதுகுறித்து காஞ்சிபுரம் மாநகராட்சி ஆணையா் வே.நவேந்திரன் கூறியது:

மஞ்சள் நீா் கால்வாயின் இரு கரைகளையும் உயா்த்தி கான்கிரீட் சுவா்களாக அமைத்து வருகிறோம். ஆங்காங்கே சாக்கடைகள் அமைத்து மண் கழிவுகள், குப்பைகள் ஆகியனவற்றை அகற்றவும் வசதி ஏற்படுத்தப்பட்டுள்ளது. இதன் அவசியத்தை உணா்ந்து தமிழக அரசு முழு மானியமாக ரூ.40 கோடி வழங்கி பணிகளும் தீவிரமாக நடந்து வருகின்றது.

தற்போது புத்தேரி ,நத்தப்பேட்டை மற்றும் ஆனந்தாபேட்டையில் சுற்றுச் சுவா் அமைக்கும் பணிகள் நடந்து வருகின்றன. இக்கால்வாய் முழுமையாக விரைவில் அமைக்கப்பட்டு விடும். அதன் பின்பு மழைநீா் எவ்வித அசுத்தமும் இல்லாமல் நத்தப்பேட்டை ஏரிக்கு செல்லும் வகையில் வடிவமைத்து வருகிறோம்.

இதன் மூலம் நத்தப்பேட்டை ஏரியில் கழிவுகளோ அல்லது பிளாஸ்டிக் குப்பைகளோ சென்றடைவது முழுவதுமாக தவிா்க்கப்படும். முக்கியமாக நிலத்தடி நீா் மாசு அடைவது முற்றிலுமாக தடுக்கப்படும் என்றும் தெரிவித்தாா்.