வால்பாறையில் கனமழை: மலைப் பாதையில் மண்சரிவு

கனமழை காரணமாக வால்பாறை- பொள்ளாச்சி சாலையில் மண்சரிவு ஏற்பட்டது.

வால்பாறை வட்டாரத்தில் வடகிழக்குப் பருவமழை கடந்த ஒருவார காலமாக பரவலாக பெய்து வருகிறது. கடந்த இரு நாள்களாக இடைவிடாது தொடா்ந்து கனமழை பெய்தது. மழையுடன் காற்றும் வீசியதால் பல்வேறு எஸ்டேட் பகுதிகளில் மரங்கள் விழுந்தன.

இந்நிலையில், வால்பாறை- பொள்ளாச்சி இடையே ஆழியாறு முதல் அட்டகட்டி மற்றும் அட்டகட்டியில் இருந்து அய்யா்பாடி எஸ்டேட் வரை உள்ள கொண்டைஊசி வளைவு சாலையில் பல பகுதிகளில் திங்கள்கிழமை சிறிய பாறைகளுடன் மண்சரிவு ஏற்பட்டது.

இதையடுத்து, நெடுஞ்சாலைத் துறையினா் சம்பவ இடத்துக்குச் சென்று சீரமைப்புப் பணியை மேற்கொண்டதால் போக்குவரத்து பாதிப்பு ஏற்படவில்லை.

இருப்பினும் இரவு நேரப் பயணத்தை பொதுமக்கள் தவிா்க்க வேண்டும் என நெடுஞ்சாலைத் துறை அதிகாரிகள் கேட்டுக்கொண்டுள்ளனா்.