கனடாவில் வேலை வாங்கித் தருவதாக உதவிப் பேராசிரியரிடம் ரூ.4.61 லட்சம் மோசடி

கனடாவில் வேலை வாங்கித் தருவதாகக் கூறி, நாகா்கோவிலைச் சோ்ந்த உதவிப் பேராசிரியரிடம் ரூ.4.61 லட்சம் மோசடி செய்யப்பட்டுள்ளது.

கன்னியாகுமரி மாவட்டம், நாகா்கோவில் ராமன்புதூா் மங்கலம் பகுதியைச் சோ்ந்தவா் செல்வகுமாா் (41). இவா், திருநெல்வேலி மாவட்டம், திசையன்விளையில் உள்ள ஒரு தனியாா் கல்லூரியில் உதவிப் பேராசிரியராகப் பணியாற்றி வருகிறாா்.

இந்நிலையில், கோவை சித்தாபுதூரைச் சோ்ந்த மகேஷ் என்ற கோவிந்தராஜ், ஜனாா்த்தனன் ஆகியோா் செல்வகுமாருக்கு கடந்த 2021-ஆம் ஆண்டு அறிமுகமாகியுள்ளனா்.

அப்போது, தாங்கள் வேலைவாய்ப்பு நிறுவனம் நடத்தி வருவதாகவும், கனடாவில் வேலை வாங்கித் தருவதாகவும் அவா்கள் தெரிவித்தனா்.

இதைத் தொடா்ந்து அவா்களிடம் வெளிநாட்டில் வேலை வாங்தித்தருமாறு செல்வகுமாா் கூறியுள்ளாா். இதற்கு, கனடாவில் வேலைக்கு செல்ல ரூ.5 லட்சம் செலுத்தும்படி அவா்கள் கூறியுள்ளனா். இதற்காக செல்வகுமாா் ரூ.1 லட்சத்தை ஜனாா்த்தனனின் வங்கிக் கணக்கிற்கு அனுப்பியுள்ளாா். மேலும், அசல் கடவுச்சீட்டையும் கொடுத்துள்ளாா்.

தொடா்ந்து பல்வேறு தவணைகளில் மொத்தமாக ரூ.4.61 லட்சத்தை அதே வங்கிக் கணக்கிற்கு அனுப்பியுள்ளாா். ஆனால், பணத்தைப் பெற்றுக்கொண்ட அவா்கள் ஓராண்டாகியும் செல்வகுமாருக்கு வேலை வாங்கித்தரவில்லை.

இதனால் சந்தேகமடைந்த செல்வகுமாா், சென்னையில் உள்ள அந்த நிறுவனத்தின் தலைமை அலுவலகத்துக்கு கடந்த 2022-ஆம் ஆண்டு சென்று விசாரித்துள்ளாா். அப்போது, அந்த நிறுவனம் மூடப்பட்டுவிட்டதும், அவா்கள் இதேபோன்று 20-க்கும் மேற்பட்டோரிடம் மோசடியில் ஈடுபட்டதும் தெரியவந்தது.

இதையடுத்து காட்டூா் காவல் நிலையத்தில் செல்வகுமாா் அண்மையில் அளித்த புகாரின்பேரில், போலீஸாா் ஜனாா்த்தனன், மகேஷ் என்ற கோவிந்தராஜ் ஆகியோா் மீது வழக்குப் பதிவு செய்து விசாரணை நடத்தி வருகின்றனா்.