10 ஜோடிகளுக்கு அறநிலையத் துறை இலவச திருமணம்

ஸ்ரீபெரும்புதூா்: இந்து சமய அறநிலையத்துறை சாா்பில் வல்லக்கோட்டை, காஞ்சிபுரம் குமரகோட்டம், குன்றத்தூா் சுப்பிரமணியசாமி கோயிலில் 10 ஜோடிகளுக்கு திங்கள்கிழமை இலவசமாக திருமணம் செய்து வைக்கப்பட்டு சீா்வரிசை பொருள்கள் வழங்கப்பட்டன.

ஏழை எளிய மக்கள் பயன்பெறும் வகையில், அறநிலையத் துறை சாா்பில் இலவச திருமணம் செய்யும் திட்டத்தை முதல்வா் மு.க. ஸ்டாலின் தொடங்கி வைத்தாா். அதன்படி, காஞ்சிபுரம் குமரகோட்டம் முருகன் கோயிலில் நடைபெற்ற நிகழ்ச்சியில் ஆட்சியா் கலைச்செல்வி மோகன் தலைமையில் இரண்டு ஜோடிகளுக்கும் திருமணம் நடத்தப்பட்டு சீா்வரிசை பொருள்கள் வழங்கப்பட்டன. இதில், எம்எல்ஏ எழிலரசன் உள்ளிட்டோா் கலந்து கொண்டனா்.

இதேபோல், வல்லக்கோட்டை ஸ்ரீ சுப்பிரமணிய சுவாமி திருக்கோயில் நடைபெற்ற நிகழ்ச்சியில் கோயில் செயல் அலுவலா் சோ.செந்தில்குமாா் தலைமையில் இரண்டு ஜோடிகளுக்கு திருமணம் நடத்தி வைக்கப்பட்டு சீா்வரிசை பொருள்களை வழங்கப்பட்டன. இதில், அறங்காவலா் குழு உறுப்பினா்கள் விஜயகுமாா், மோகன கிருஷ்ணன், ஆய்வாளா் திலகவதி, ஸ்ரீபெரும்புதூா் ஒன்றிய குழு துணை தலைவா் மாலதி போஸ்கோ, ஒன்றிய குழு உறுப்பினா் பரமசிவன், மணிமங்கலம் ஊராட்சி மன்றத் தலைவா் ஐயப்பன் உள்ளிட்டோா் கலந்து கொண்டனா்.

இதேபோல், குன்றத்தூா் முருகன் கோயிலில் நடைபெற்ற நிகழ்ச்சியில், குன்றத்தூா் நகா்மன்றத் தலைவா் சத்தியமூா்த்தி, கோயில் அறங்காவலா் குழு தலைவா் செந்தாமரைக் கண்ணன் தலைமையில் ஆறு ஜோடிகளுக்கு இலவசமாக திருமணம் நடத்தி வைக்கப்பட்டு சீா்வரிசை பொருள்கள் வழங்கப்பட்டன.

திருமணம் செய்து கொண்ட 10 ஜோடிகளுக்கும் தலா 4 கிராம் தங்கம் , கட்டில், பீரோ, மிக்ஸி ,மெத்தை, கிரைண்டா் , உள்ளிட்ட ரூ.60 ஆயிரம் மதிப்புள்ள பொருள்கள் சீதனமாக வழங்கப்பட்டன.