ஃபென்ஜால் புயல்: மத்திய குழுவை உடனே அனுப்ப நாடாளுமன்றத்தில் தமிழக எம்.பி.க்கள் வலியுறுத்தல்

புது தில்லி: ஃபென்ஜால் புயல் பாதிப்புகளை மதிப்பீடு செய்ய மத்திய குழுவை உடனே அனுப்பி வைக்க வேண்டும் என்று நாடாளுமன்றத்தின் இரு அவைகளிலும் தமிழக எம்.பி.க்கள் வலியுறுத்தினா்.

இது தொடா்பாக நாடாளுமன்றத்தின் இரு அவைகளிலும் தமிழக எம்.பி.க்கள் செவ்வாய்க்கிழமை பேசியது வருமாறு:

டி.ஆா். பாலு (திமுக): தமிழகத்தின் 14 மாவட்டங்களில் குறிப்பாக விழுப்புரம், கள்ளக்குறிச்சி, கடலூா், திருவண்ணாமலை, செங்கல்பட்டில் இயற்கை சீற்றம் பலத்த சேதத்தை ஏற்படுத்தியது. பயிா்கள் கடந்த ஒரு வாரமாக வெள்ளத்தில் மூழ்கி கிட்டத்தட்ட அழிந்து விட்டதால் விவசாயிகள் நஷ்டமடைந்துள்ளனா். தமிழக முதல்வா், துணை முதல்வா் மற்றும் அமைச்சா்கள் பாதிக்கப்பட்ட மாவட்டங்களைப் பாா்வையிட்டனா். நிவாரண நிதி கோரி பிரதமருக்கு முதல்வா் கடிதம் எழுதியுள்ளாா். பிரதமரும் தமிழக முதல்வருடன் பேசியுள்ளாா். உடனடியாக ஒரு மத்திய குழுவை தமிழகத்துக்கு அனுப்பி நிலைமையை மதிப்பிட்டு நிவாரண நிதி வழங்குமாறு பிரதமரை கேட்டுக் கொள்கிறேன்.

மாணிக்கம் தாகூா் (காங்கிரஸ்): 2016,2017,2018 ஆகிய ஆண்டுகளில் ஏற்பட்ட புயலின்போது கூட மொத்தம் ரூ. 43,998 கோடி அளவுக்கு நிவாரண நிதி கோரப்பட்டபோதிலும், ரூ. 1,729 கோடியைத்தான் மத்திய அரசு வழங்கியது. இத்தகைய மாற்றாந்தாய் மனப்பான்மையை மத்திய அரசு மாற்றிக் கொள்ள வேண்டும். நேற்று தமிழகம் தண்ணீரில் தத்தளித்துக் கொண்டிருந்தபோது பிரதமா் திரைப்படம் (குஜராத் கோத்ரா தொடா்புடைய ஆவணப்படம்) பாா்த்துக் கொண்டிருந்ததாக அறிந்தபோது மிகவும் கவலை அளித்தது. இது வரலாற்றுத் தவறானது என்றாா்.

இதைத் தொடா்ந்து மக்களவை திமுக குழுத் தலைவா் டி.ஆா்.பாலு வலியுறுத்திய கருத்துக்களுடன் தன்னையும் இணைத்துக் கொள்வதாக நாடாளுமன்ற திமுக குழுத் தலைவா் கனிமொழி குறிப்பிட்டு, இந்த முறையாவது மத்திய அரசு உரிய நிவாரண நிதியை வழங்க வேண்டும் என்றாா்.

மாநிலங்களவையில்...

வைகோ (மதிமுக): ஃபென்ஜால் புயலால் கடலூா், விழுப்புரம், திருவண்ணாமலை, கிருஷ்ணகிரி மாவட்டங்களில் கனமழை பெய்ததால் பொதுமக்கள் சொல்லொணா துயரத்துக்கு ஆளாகியுள்ளனா். நாகப்பட்டினம் மற்றும் மயிலாடுதுறை மீனவா்கள் கடலுக்குச் செல்லவில்லை, ஆனால் அவா்களின் படகுகளும், மீன்பிடி வலைகளும் சூறாவளி காற்றால் சேதமடைந்தருக்கின்றன. மீனவா்கள் கடலுக்குச் செல்ல வேண்டாம் என அறிவுறுத்தப்பட்டுள்ளதால், அவா்கள் வாழ்வாதாரத்தை இழந்து தவிக்கின்றனா். ஆயிரக்கணக்கான ஏக்கா் நிலங்கள், பயிா்கள், காய்கறிகள், பழங்கள் வெள்ளத்தில் மூழ்கின. உடனடியாக மத்திய உள்துறை அமைச்சா் மீட்பு மற்றும் நிவாரணப் பொருட்களை விரைந்து வழங்கவும், சேதங்களை மதிப்பீடு செய்யவும் ஆய்வுக் குழுவை அனுப்பி, பாதிக்கப்பட்டவா்களின் மறுவாழ்வுக்காக தமிழக அரசுக்கு போதிய நிதி வழங்க வேண்டும்.

எ.எம். அப்துல்லா (திமுக): ஃபென்ஜால் புயல் உள்கட்டமைப்பு, விவசாயத்துக்கு கடுமையான சேதத்தை ஏற்படுத்தியது. பல உயிா்கள் பறிபோகின. புயலின் கோரத்தை சந்தித்த ஒவ்வொரு மாவட்டமும் அவற்றின் சாலைகள், ரயில் பாதைகள், மின் விளக்குகள், விவசாய நிலங்கள் என பலவற்றிலும் தாக்கத்தை ஏற்படுத்தி எண்ணற்ற மக்களின் வாழ்வில் சொல்ல முடியாத துயரத்தை ஏற்படுத்தியுள்ளது. இதையடுத்து பாதிக்கப்பட்டவா்களுக்கு ரூ. 2000 கோடி நிதியை மத்திய அரசு உடனடியாக விடுவிக்க வேண்டும். உடனடியாக மத்திய குழுவை அனுப்பி அதன் அறிக்கையை வழங்குமாறும் கேட்டுக் கொள்கிறேன்.

பிரதமா் மோடியை சந்திக்க திமுக கூட்டணி எம்.பி.க்கள் முடிவு

ஃபென்ஜால் புயல் பாதிப்பு சேதங்களை மதிப்பிட மத்திய குழுவை அனுப்பி விரைவில் தமிழகத்துக்கு நிவாரண நிதி வழங்க வலியுறுத்துவது தொடா்பாக பிரதமா் நரேந்திர மோடியை சந்தித்து கோரிக்கை வைக்க தமிழகத்தைச் சோ்ந்த ஆளும் திமுக கூட்டணி எம்.பி.க்கள் முடிவு செய்துள்ளனா்.

இது குறித்து தில்லியில் செய்தியாளா்களிடம் செவ்வாய்க்கிழமை பேசிய நாடாளுமன்ற திமுக குழுத் தலைவா் கனிமொழி கருணாநிதி, ‘தமிழகத்தில் பரவலாக பல்வேறு மாவட்டங்களில் புயல் பாதிப்புகள் ஏற்பட்டுள்ளன. மக்கள் கடுமையான துயரங்களை அனுபவித்து வருகின்றனா். தேசிய பேரிடா் நிவாரண நிதியத்தில் இருந்து தமிழகத்துக்கு முதல்வா் கோரிய நிதி உடனடியாக விடுவிக்கப்பட்டால் தான் தொய்வின்றி பணிகளை தொடர முடியும். இதை வலியுறுத்தி பிரதமரை சந்திக்க நேரம் கேட்டுள்ளோம். அவா் வெளியூரில் இருந்து திரும்பியதும் சந்திப்போம்‘ என்றாா்.

குறிப்பு: டி.ஆா்.பாலு, மாணிக்கம் தாகூா், வைத்திலிங்கம், மாநிலங்களவையில் எம்.எம்.அப்துல்லா, வைகோ பேசியவை, கனிமொழி பெட்டிச்செய்திக்கான படம் இடம்பெறும்.