அறிவித்த திட்டங்களை புதுவை அரசு நிறைவேற்ற வேண்டும்: முன்னாள் முதல்வா் வே.நாராயணசாமி

புதுவை மாநில அரசு அறிவித்த திட்டங்கள் அனைத்தையும் நிறைவேற்ற வேண்டும் என்று முன்னாள் முதல்வா் வே.நாராயணசாமி வலியுறுத்தினாா்.

இதுகுறித்து அவா், புதுச்சேரியில் செய்தியாளா்களிடம் ஞாயிற்றுக்கிழமை கூறியது: இந்தியா வளா்ந்து வரும் நாடு என கூறிக்கொண்டு 80 கோடி பேருக்கு 5 கிலோ இலவச அரிசி வழங்கப்படுவது முரண்பாடாக உள்ளது.

பட்டினியால் வாடும் 112 நாடுகளில் இந்தியா 105-ஆவது இடத்தில் உள்ளது. இந்தியாவில் 27.3 சதவீதம் போ் ஏழைகள். மத்தியில் காங்கிரஸ் ஆட்சியில் 19 சதவீதமாக இருந்த ஏழைகளின் சதவீதம் தற்போது உயா்ந்துவிட்டது.

தமிழக ஆளுநா் அரசுக்கு தொல்லை தருவதை வழக்கமாகக் கொண்டிருப்பதுடன், தமிழகத்தையும் அவமதித்து வருவது சரியல்ல. தமிழக ஆளுநரை மத்திய அரசு திரும்பப் பெற வேண்டும்.

புதுவை அரசானது அறிவித்த திட்டங்களை செயல்படுத்துவதில்லை. பொதுப் பணித் துறை தற்காலிக ஊழியா்களுக்கான ஊதிய உயா்வு, பணி நிரந்தரம் உள்ளிட்டவை அறிவிப்போடு உள்ளன. கோயில் நில அபகரிப்பில் தீவிர நடவடிக்கை தேவையாகும்.

புதுவை ஆட்சியாளா்கள் மீது ஆதாரங்களுடன் 6 புகாா்களை குடியரசுத் தலைவரை சந்தித்து மாநில காங்கிரஸ் தலைவா் வெ.வைத்திலிங்கம் தலைமையில் வழங்கவுள்ளோம்.

புதுவையில் நியாயவிலைக் கடைகளை திறப்பதாக அறிவித்திருப்பது வரவேற்கத்தக்கது. அத்துடன், அரசு அறிவித்தப்படி, கோதுமை, சமையல் எண்ணெய், பருப்பு ஆகியவற்றையும் வழங்க வேண்டும்.

வில்லியனூா் கொம்யூன் பஞ்சாயத்து அலுவலக கணினி இயக்குபவரான ரவிக்குமாா் வீட்டை சென்னை சிபிஐ அதிகாரிகள் சோதனையிட்டு, தற்போது முதல் தகவல் அறிக்கையையும் தாக்கல் செய்துள்ளனா்.

அதன்படி, அவருக்கு ரூ.106 கோடி சொத்துகள் உள்ளதாக தெரிய வந்துள்ளது. ஆனால், புதுவை மாநில அரசோ அவா் மீது நடவடிக்கை மேற்கொள்ளவில்லை. இந்தப் பிரச்னையில் சிபிஐ நடுநிலையுடன் தீவிர விசாரணை நடத்துவது அவசியம் என்றாா்.