பச்சை நிறமான கடல்நீா்: பேராசிரியிா்கள் ஆய்வு

புதுச்சேரியில் கடல் நீரானது ஞாயிற்றுக்கிழமை திடீரென்று பச்சை நிறத்துக்கு மாறிய நிலையில், ஜெல்லி மீன் உள்ளிட்டவை கரை ஒதுங்கின. இதுகுறித்து, கடல் ஆய்வு மைய பேராசிரியா்கள் கடல்நீரை எடுத்து ஆய்வுக்கு உள்படுத்தியுள்ளனா்.

வங்கக் கடலில் குறைந்த காற்றழுத்த தாழ்வு மண்டலம் உருவானதால், புதுச்சேரியில் கடந்த சில நாள்களாக மழை பெய்தது. இந்த நிலையில், புதுச்சேரி கடற்கரையில் சனிக்கிழமை இரவு கடல் அலையானது திடீரென நீல நிறத்தில் ஒளிா்ந்தது.

கடற்கரைக்கு வந்த பொதுமக்கள் இதனை ஆா்வமுடன் பாா்த்தனா். ஞாயிற்றுக்கிழமை காலை முதல் கடல் அலை வழக்கமான நிறத்தில்தான் இருந்தது. ஆனால், பகலில் திடீரென கடல் அலையின் நிறமானது, பச்சை நிறத்துக்கு மாறத் தொடங்கியது.

பச்சை நிற அலை வரும்போது துா்நாற்றம் வீசியது. கடலில் சுற்றுலாப் பயணிகள் குளித்த நிலையில், அவா்களது உடலிலும் அரிப்பு ஏற்பட்டதாகக் கூறினா்.

தகவலறிந்து வந்த போலீஸாா் யாரும் கடலில் குளிக்க வேண்டாம் என எச்சரித்து அனுப்பினா். புதுச்சேரி கடல் ஆராய்ச்சி மையத்தின் பேராசிரியா்கள் வந்து கடல் நீரை ஆய்வுக்கு எடுத்துச் சென்றனா்.

புதுச்சேரி மாசுக் கட்டுப்பாட்டு வாரிய உறுப்பினா் செயலா் ரமேஷ் தலைமையில் கடல் நீா் ஆய்வுக்கு எடுத்துச் செல்லப்பட்டது. கடற்கரையில் ஜெல்லி மீன் போன்றவை இறந்து கரை ஒதுங்கின. கடல் பாசிகள் மற்றும் பாக்டீரியாக்களின் கூட்டத்தால் கடல் நீா் நிறம் மாறும் வாய்ப்புள்ளதாக ஆராய்ச்சி மைய பேராசிரியா்கள் கூறினா்.