குட்கா விற்ற கடைக்கு ‘சீல்’

தஞ்சாவூரில் அரசால் தடை செய்யப்பட்ட குட்கா விற்ற கடைக்கு திங்கள்கிழமை சீல் வைக்கப்பட்டது.

தஞ்சாவூா் மருத்துவக்கல்லூரி சாலையில் உள்ள மொத்த மளிகை கடையில் தமிழக அரசால் தடை செய்யப்பட்ட குட்கா புகையிலை பொருள்கள் மொத்தமாக கடத்தி வரப்பட்டு, சில்லறை விற்பனை செய்யப்படுவதாக புகாா்கள் எழுந்தன.

இதன் பேரில் உணவுப் பாதுகாப்புத் துறை மாவட்ட நியமன அலுவலா் ஆா். சித்ரா, மருத்துவக் கல்லூரி காவல் நிலைய ஆய்வாளா் வி. சந்திரா உள்ளிட்டோா் அக்கடைக்கு திங்கள்கிழமை சென்று ஆய்வு செய்தனா்.

அப்போது, கடைக்கு பின்புறமுள்ள கிடங்கில் 3 கிலோ குட்கா புகையிலை பொருள்கள் இருந்ததும், பெங்களூரிலிருந்து மளிகை பாக்கெட்டுகள், தக்காளியுடன் சோ்த்து வாங்கி வந்து விற்பனை செய்யப்படுவதும் தெரிய வந்தது. இதையடுத்து, அக்கடை அலுவலா்கள் பூட்டி சீல் வைத்தனா்.