கும்பகோணம் உள்ளூா் வாய்க்காலை ஆக்கிரமித்திருந்த 26 வீடுகள் அகற்றம்

தஞ்சாவூா் மாவட்டம், கும்பகோணத்தில் உள்ளூா் வாய்க்காலை ஆக்கிரமித்துக் கட்டப்பட்டிருந்த 26 வீடுகள் செவ்வாய்க்கிழமை அகற்றப்பட்டன.

கோயில் நகரமான கும்பகோணத்தில் நீா்நிலைகள், நீா்வழிப் பாதைகளை ஆக்கிரமித்து கட்டப்பட்ட கட்டடங்களை உயா்நீதி மன்ற உத்தரவுப்படி மாநகராட்சி நிா்வாகத்தினா் அகற்றி வருகின்றனா்.

அதன்படி முக்கியமான ஆக்கிரமிப்பான காசிராமன் தெருவிலிருந்து நால்ரோடு பகுதி வரை உள்ளூா் வாய்க்காலை ஆக்கிரமித்து சுமாா் 3 கிமீ தூரம் கட்டப்பட்டிருந்த 26 வீடுகளை மாநகராட்சி அதிகாரிகள் பொக்லைன் இயந்திரம் மூலம் இடித்து அப்புறப்படுத்தினா்.

மீண்டும் அந்த இடத்தில் ஆக்கிரமிக்காமலிருக்க பாதுகாப்பு ஏற்பாடுகளையும் செய்தனா்.