`சீதாவுக்குப் பதில் சுஜிதா' - சமையல் நிகழ்ச்சியில் நடத்த மாற்றத்தின் பின்னணி என்ன?

ஜீ தமிழ் சேனலில் சில தினங்களுக்கு முன் தொடங்கிய 'கிச்சன் எக்ஸ்பிரஸ்' நிகழ்ச்சியிலிருந்து நடிகை சீதா வெளியேறியிருக்கிறார். அவருக்குப் பதில் 'பாண்டியன் ஸ்டோர்ஸ்' முதல் சீசனில் நடித்த நடிகை சுஜிதா கமிட் ஆகியிருக்கிறார்.

நிகழ்ச்சி தொடங்கிய சில நாட்களிலேயே சீதா வெளியேறியதற்கான காரணம் குறித்து நிகழ்ச்சி தொடர்புடைய வட்டாரத்தில் பேசினோம்.

''சமீபமா எல்லா டிவி சேனல்கள்லயுமே குக்கரி தொடர்பான ஷோவுல ரொம்பவே ஆர்வம் காட்டுறாங்க. ரசிகர்கள் மத்தியில் கிடைக்கிற ஆதரவே இதற்குக் காரணம்.  ஜீ தமிழ்ல்ல இதுக்கு முன்னாடி ஒளிபரப்பான குக்கரி ஷோக்களுக்குமே நல்ல வரவேற்பு கிடைச்சதால இப்ப அதாவது கடந்த மாதம் 15ம் தேதியிலிருந்து 'சமையல் எக்ஸ்பிரஸ்'ங்கிற இந்த ஷோவைத் தொடங்கினாங்க. நடிகை சீதா ரொம்ப வருஷமா சின்னத்திரைப் பக்கமே வராம இருக்கிறதால அவங்க வந்தா நல்லா இருக்கும்னு அவங்ககிட்ட பேசி அவங்களைக் கமிட் செய்தாங்க.

அவங்களுமே முதல்ல வர யோசிக்கத்தான் செஞ்சாங்க. தொடர்ந்து பேசினதுல நிகழ்ச்சிக்குள் வந்தாங்க' என்றவர்கள், ஆனால் என்ன காரணம்னு தெரியலைங்க, நிகழ்ச்சிக்கான புரோமோ ஷூட் தொடங்கியதுல இருந்தே பிரச்னையும் தொடங்கிடுச்சுன்னுதான் சொல்லணும்' என்றார்கள்.

அதாவது, ஷோவுக்கான புரோமோ ஷூட்டிங்கின் போதே சீதா தொடர்புடைய காட்சிகளைத் தனியாகவும் இன்னொரு விருந்தினராகக் கலந்துகொண்ட புதுச்சேரி இயற்கை விவசாயி கிருஷ்ணா மெக்னசி தொடர்புடைய ஷூட்டைத் தனியாகவும் தான் எடுத்தார்களாம்.

கிருஷ்ணா மெகன்சி தரப்பிலிருந்து வந்த சில கன்டிஷன்களே இப்படி ஷூட் செய்யப்பட்டதற்கான காரணமென்கிறார்கள். 'ஆரம்பமே இப்படி அக்கப்போரா இருக்கே' எனச் சேனல் நினைத்தாலும், வேறு வழியில்லாமல் சகித்துக்கொண்டு போயிருக்கிறார்கள். தனித் தனி ஷூட் என்ற இந்த விஷயத்திலேயே சீதா கொஞ்சம் அப்செட் ஆனாலும் அதைக் காட்டிக் கொள்ளவில்லையாம்.

புரோமோ ஷூட்டிங்கின் போது இன்னொரு விஷயமும் நடந்திருக்கிறது. அதாவது முதல் புரோமோ வீடியோவில் நிகழ்ச்சியைத் தொகுத்து வழங்கிய ஆயிஷாவே இடம்பெறவில்லை. இதனால் அவருக்குமே அதிருப்தி. இத்தனை களேபரங்களுக்கு நடுவே தான் ஒருவழியாக நிகழ்ச்சி தொடங்கியிருக்கிறது.  இரண்டு வாரங்களே ஒளிபரப்பான நிலையில் சீதா ஷூட்டிங்கில் கலந்துகொள்வதில் சில சிக்கல்கள் உண்டாகி, கடைசியில் தொடர்ந்து அவரால் ஷோவில் பங்கேற்க முடியாத சூழல் எனக் கருதிய சேனல் அவருக்குப் பதில் நடிகை சுஜிதாவைக் கமிட் செய்யலாமென்கிற முடிவுக்கு வந்ததாகத் தெரிகிறது.

முன்னெல்லாம் சீரியல்லதான் 'இவருக்குப் பதில் இவர்'னு வரும். இப்ப என்னடான்னா ரியாலிட்டி ஷோக்கள்லயும் வந்திடுச்சு... வேறென்ன சொல்றது?

குக் வித் கோமாளியில் பங்கெடுத்த சுஜிதா இந்த நிகழ்ச்சிக்கு எவ்வளவு பொருத்தமாக இருப்பார் என்பதைக் கமென்ட்டில் பதிவிடுங்கள்!