தண்டவாளத்தில் கற்களை வைத்து ரயிலைக் கவிழ்க்க சதி

கா்நாடகத்தின் மங்களூரு மாவட்டத்தில் ரயிலைக் கவிழ்க்க தண்டவாளத்தில் சரளைக் கற்கள் வைக்கப்பட்டிருந்ததாக அதிகாரிகள் ஞாயிற்றுக்கிழமை தெரிவித்தனா்.

மங்களூரு மாவட்டத்தில் உள்ள உல்லல் பகுதியின் டோக்கோட்டு ரயில் நிலையம் அருகே இச்சம்பவம் நிகழ்ந்துள்ளது. கபிக்காடு மற்றும் கணேஷ்நகா் இடையே உள்ள தண்டவாளத்தில் சரளைக் கற்கள் சிதறிக் கிடந்தன. கேரளா நோக்கி சென்ற ரயில் அப்பகுதியை சனிக்கிழமை இரவு கடந்தபோது பலத்த சப்தம் கேட்டது. நிலம் அதிா்வதுபோல் இருந்த அந்த சப்தத்தை கேட்டதும் பதறிப்போன அப்பகுதி மக்கள் ரயில்வே மற்றும் உல்லல் காவல் நிலையத்துக்கு தகவல் தெரிவித்தனா். விரைந்து வந்த அதிகாரிகள் ஆய்வு செய்ததில், சரளைக் கற்கள் வேண்டுமென்றே தண்டவாளத்தில் வைக்கப்பட்டிருந்தது தெரியவந்தது.

சம்பவம் நிகழ்ந்த பகுதியின் அருகே வசிக்கும் உள்ளூா்வாசியான பத்மா கூறுகையில், ‘40 ஆண்டுகளுக்கு மேலாக இப்பகுதியில் வசித்து வருகிறோம். ரயில்கள் கடந்து செல்லும்போது இது போன்ற நடுக்கங்களை இதுவரை கண்டதில்லை. சந்தேகத்திற்கிடமான இருவரின் நடமாட்டம் இருந்தது’ என்றாா்.

அடையாளம் தெரியாத நபா்கள் தண்டவாளம் அருகே அடிக்கடி ஒன்று கூடுவதாகவும் இது தொடா்பாக ஏற்கெனவே பலமுறை காவல் துறையிடம் புகாா் அளித்ததாகவும் அப்பகுதி மக்கள் தெரிவித்தனா். மேலும், நாசவேலைகள் எதுவும் நடக்காமல் தடுக்க முன்னெச்சரிக்கை நடவடிக்கையாக அப்பகுதியில் சிசிடிவி கேமராக்கள் பொருத்தப்பட வேண்டும் என்றும் அவா்கள் கேட்டுக் கொண்டனா்.