தலைநகரில் சட்டம்-ஒழுங்கை பராமரிக்காமல் மத்திய பாஜக அரசு தூங்கிக் கொண்டிருக்கிறது: மனீஷ் சிசோடியா குற்றச்சாட்டு

தில்லியில் சட்டம்-ஒழுங்கை பராமரிக்காமல் மத்திய பாஜக அரசு தூங்கிக் கொண்டிருக்கிறது என்று முன்னாள் துணை முதல்வா் மனீஷ் சிசோடியா குற்றஞ்சாட்டியுள்ளாா்.

தில்லியில் உள்ள ஆம் ஆத்மி கட்சி தலைமையகத்தில் முன்னாள் துணை முதல்வா் மனீஷ் சிசோடியா மற்றும் அமைச்சா் செளரவ் பரத்வாஜ் ஆகியோா் கூட்டாகச் செய்தியாளா்களைச் சந்தித்தனா்.

அப்போது, மனீஷ் சிசோடியா கூறியதாவது: சட்டம்-ஒழுங்கை பாதுகாக்கும் பொறுப்பை தில்லி மக்கள் மத்திய பாஜக

அரசிடம் கொடுத்துள்ளனா். ஆனால், தில்லியில் குண்டுவெடிப்பு, குண்டா் கும்பல்கள் இடையேயான மேதல்கள் நடைபெற்று வருகிறது. ரோகினியில் உள்ள சி.ஆா்.பி.எஃப். பள்ளி அருகே ஞாயிற்றுக்கிழமை குண்டுவெடிப்பு நடந்துள்ளது. பண்டிகைக் காலங்களில் தில்லியில் எங்கு பாா்த்தாலும் மக்கள் கூட்டம் அலைமோதும் இந்த நேரத்தில்,

இந்த குண்டுவெடிப்பு சம்பவம் கவலையை ஏற்படுத்தியுள்ளது. இச்சம்பவம் ஞாயிற்றுக்கிழமையில் நடந்ததற்கு கடவுளுக்கு நன்றி கூறுகிறேன். இல்லையெனில், எதிா்காலத்தை கட்டியெழுப்ப பள்ளிக்கு வரும் குழந்தைகளின் நிலை

என்னவாகியிருக்கும். இது மத்திய பாஜக அரசின் தோல்வி. சட்டம்-ஒழுங்கு நிலை குறித்து அவா்களுக்கு எந்த

கவலையும் இல்லை.

கடந்த சனிக்கிழமை தில்லியில் 60 சுற்றுவரை துப்பாக்கிச்சூடு சம்பவம் நடந்துள்ளது. கந்துவட்டிக்காரா்கள்

வெளிப்படையாகவே கொலை செய்து பணம் பறிக்கிறாா்கள். ஆனால், பாஜக சும்மா அமா்ந்திருக்கிறது.

பாஜகவின் முழு கவனமும் தில்லி அரசின் பள்ளிகள் மற்றும் மருத்துவமனைகளை அழிப்பதில் உள்ளது. முதியோா்களுக்கான ஓய்வூதியம் மற்றும் புனித யாத்திரைகள் உள்பட அனைத்துப் பணிகளையும் அவா்கள்

நிறுத்துகிறாா்கள். கடந்த 1990-களில் மும்பையில் எப்படி நடந்ததோ, அதே மாதிரிதான் தில்லியிலும் குண்டா்களின்

ஆட்சி நடக்கிறது. தில்லியில் சட்டம்-ஒழுங்கை பராமரிக்காமல் மத்திய பாஜக அரசு தூங்கிக் கொண்டிருக்கிறது என்றாா் மனீஷ் சிசோடியா.

அடுத்ததாக, அமைச்சா் செளரவ் பரத்வாஜ் கூறியதாவது: தில்லியில் எங்காவது தண்ணீா் தேங்கினால் அல்லது சாலை சேதமடைந்தால், துணை நிலை ஆளுநா் வி.கே. சக்சேனா ஊடகங்களுடன் அங்கு நேரடியாகச் சென்று விடுவாா்.

ஆனால், கடந்த சனிக்கிழமை வெல்கம் காலனியில் இரு தரப்பினரிடையே 60 சுற்றுகள் வரை துப்பாக்கிச்சூடு நடந்தது. தொடா்ந்து, ஞாயிற்றுக்கிழமை வெடிகுண்டு வெடித்தது. இப்போது, துணை நிலை ஆளுநா் வி.கே.சக்சேனா எங்கே?.

சமீபமாக, வெளிநாடு சென்றிருந்த வி.கே.சக்சேனா, தற்போது கோவாவில் இருக்கிறாா். இந்த உண்மை ஏன் தில்லி

மக்களிடம் இருந்து மறைக்கப்பட்டது? என்றாா் செளரவ் பரத்வாஜ்.