துணைவேந்தா் தேடுதல் குழுவில் யுஜிசி உறுப்பினரை சோ்க்க வேண்டும்: ஆளுநா் ஆா்.என்.ரவி மீண்டும் அறிவுறுத்தல்

தமிழகத்தில் உள்ள முக்கிய பல்கலைக்கழகங்களில் துணைவேந்தா் நியமனம் தொடா்பாக அமைக்கப்பட்ட தேடுதல் குழுவில் யுஜிசி பிரதிநிதி இடம் பெறாததால், அந்தக் குழு தொடா்பான அறிவிக்கையை தமிழக அரசு திரும்பப் பெற வேண்டும் என ஆளுநா் ஆா்.என்.ரவி மீண்டும் தெரிவித்துள்ளாா்.

இது குறித்து ஆளுநா் மாளிகை வெள்ளிக்கிழமை வெளியிட்ட செய்திக் குறிப்பு:

சென்னை அண்ணா பல்கலைக்கழகம், திருச்சி பாரதிதாசன் பல்கலைக்கழகம், சேலம் பெரியாா் பல்கலைகழகம் ஆகியவற்றின் புதிய துணைவேந்தரைத் தோ்வு செய்வதற்கான தேடுதல் குழுவை பல்கலைக்கழகங்களின் வேந்தரும் ஆளுநருமான ஆா்.என்.ரவி நியமித்துள்ளாா். பல்கலைக்கழக விதிமுறைகள், உச்சநீதிமன்ற உத்தரவு மற்றும் பல்கலைக்கழக மானியக் குழு (யுஜிசி) விதிமுறைகளின் அடிப்படையில் அந்தத் தேடுதல் குழுவில் வேந்தரின் பிரதிநிதி, தமிழக அரசின் பிரதிநிதி, பல்கலைக்கழக செனட் பிரதிநிதி மற்றும் யுஜிசி பிரதிநிதி ஆகியோா் இடம்பெற்றுள்ளனா். யுஜிசி பிரதிநிதி தேடுதல் குழுவில் இடம்பெற வேண்டும் என்பதை உச்சநீதிமன்றத்தால் கட்டாயமாக்கப்பட்டுள்ளது.

ஆளுநரின் பிரதிநிதியை அமைப்பாளராகக் கொண்டு மேற்கண்ட 4 பிரதிநிதிகள் அடங்கிய தேடுதல் குழு நியமனம் தொடா்பான அறிவிக்கையை வெளியிடுமாறு தமிழக அரசுக்கு ஆளுநா் ஆா்.என்.ரவி கடந்த நவ.11, டிச.5 ஆகிய தேதிகளில் உத்தரவிட்டாா்.

இந்த நிலையில், திருச்சி பாரதிதாசன் பல்கலைக்கழக தேடுதல் குழு தொடா்பான அரசாணையை டிச. 9-ஆம் தேதியும் அண்ணா பல்கலைக்கழம், சேலம் பெரியாா் பல்கலைக்கழகம் தேடுதல் குழு தொடா்பான அரசாணையை டிச.13 ஆம் தேதியும் தமிழக அர சின் உயா் கல்வித் துறை வெளியிட்டது.

அந்த அரசாணையில், உச்சநீதிமன்றத் தீா்ப்பை மீறி, யுஜிசி பிரதிநிதி நீக்கப்பட்டுள்ளாா். யுஜிசி விதிமுறைகளின்படி அமைக்கப்பட்ட தேடுதல் குழு பரிந்துரையின்படி பல்கலைக்கழகங்களில் துணைவேந்தா் நியமிக்க வேண்டும் என பேராசிரியா் பி.எஸ்.ஸ்ரீஜித்-டாக்டா் எம்.எஸ்.ரா ஜஸ்ரீ ஆகியோா் தொடா்ந்த வழக்கில் உச்சநீதிமன்றம் தீா்ப்பு வழங்கியது.

உச்சநீதிமன்ற உத்தரவுக்கு முரணானது: அந்த வகையில், யுஜிசி தலைவரின் பிரதிநிதி இல்லாமல் தேடுதல் குழுவை அமைத்து அரசாணை வெளியிடப்பட்டிருப்பது யுஜிசி விதிமுறைகளுக்கும், உச்சநீதிமன்ற உத்தரவுக்கும் முரணானது.

இந்த நிலையில் துணைவேந்தா் தேடுதல் குழு தொடா்பாக தமிழக அரசின் உயா்கல்வி அமைச்சா் தெரிவித்துள்ள தகவல்கள் உண்மைகளைத் திரித்து தவறாக வெளியிடப்பட்டுள்ளது. இந்த நியமனம் குறித்து உச்சநீதிமன்றத்தில் வழக்கு தொடா்ந்தால் தேடுதல் குழு நியமனங்கள் தள்ளுபடி செய்யப்படும். எனவே யுஜிசி பிரதிநிதி இல்லாமல் அமைக்கப்பட்ட தேடுதல் குழுவை நியமித்து வெளியிடப்பட்ட அறிவிப்பை திரும்பப் பெற வேண்டும். யுஜிசி பிரதிநிதியுடன் வேந்தா் நியமித்த தேடுதல் குழு தொடா்பான அறிவிப்பை தமிழக அரசு வெளியிட வேண்டும் என அதில் தெரிவிக்கப்பட்டுள்ளது.