நாகை மோசடி வழக்கு: போலி பிணையதாரா் கைது

திருவாரூா் அருகே பாலிஷ் போடுவதாக நகை மோசடி செய்த வழக்கில், போலி பிணையதாரராக செயல்பட்டவா் புதன்கிழமை கைது செய்யப்பட்டாா்.

கடந்த 2019-இல், குடவாசல் அருகே செருகளத்துாா், கீழவீதியில் சுப்பிரமணியன் மனைவி கவிதா என்பவா், வீட்டில் தனியாக இருந்தபோது அங்கு வந்த இரண்டு போ், நகையை பாலீஷ் செய்து தருவதாகக் கூறி, எடுத்துச் சென்றுவிட்டனா். இது தொடா்பாக கவிதா அளித்த புகாரின் பேரில், குடவாசல் போலீஸாா் வழக்குப் பதிந்து, நகைகளை ஏமாற்றி வாங்கிச் சென்ற பிகாா் மாநிலத்தைச் சோ்ந்த மனிஷ்குமாா் என்பவரை கைது செய்து சிறையில் அடைத்தனா்.

இதனிடையே, மணக்கால் அய்யம்பேட்டையை சோ்ந்த காளி மகன் சோமு (65) என்பவா், திருவாரூா் நீதித்துறை நடுவா் நீதிமன்றத்தில் போலி பிணையளித்ததன் பேரில், மனிஷ்குமாா் சிறையிலிருந்து வெளியில் வந்து, சொந்த மாநிலமான பிகாருக்கு சென்றுவிட்டாா்.

மேலும், வழக்கில் தொடா்புடைய ரஞ்சித் பிரசாத் தொடா்ந்து நீதிமன்றத்தில் ஆஜராகாமல் இருந்ததால், அவருக்கு நீதிமன்றம் பிடிக்கட்டளை பிறப்பித்தது.

இந்நிலையில், பிடிக்கட்டளையை நிறைவேற்ற முடியாத காரணத்தால், பிணையதாரா் மீது நடவடிக்கை மேற்கொள்ளப்பட்டது. பிணையதாரரான சோமு, நன்னிலம் நீதிமன்றத்தில் ஆஜராகி வழக்கில் தொடா்புடையவரைப் பற்றி தெரியாது எனக் கூறியதால், நன்னிலம் நீதிமன்ற எழுத்தா் கொடுத்த புகாரின் பேரில், குடவாசல் போலீஸாா் பொய்சாட்சியம் அளித்தல், ஏமாற்றுதல், பொய்யான ஆவணங்களை வழங்குதல் போன்ற 4 பிரிவுகளின் படி வழக்குப் பதிவு செய்து, சோமுவை புதன்கிழமை கைது செய்தனா்.