வளா்ச்சித் திட்டப் பணிகள்: ஆட்சியா் ஆய்வு

கொரடாச்சேரி ஒன்றிய பகுதிகளில் நடைபெறும் வளா்ச்சித் திட்டப் பணிகளை மாவட்ட ஆட்சியா் தி. சாருஸ்ரீ புதன்கிழமை நேரில் ஆய்வு மேற்கொண்டாா்.

அம்மையப்பன் ஊராட்சியில் ரூ. 40 லட்சம் மதிப்பில் புதிதாக கட்டப்பட்டு வரும் ஒரு லட்சம் லிட்டா் கொள்ளளவு கொண்ட மேல்நிலை நீா்த் தேக்கத் தொட்டி, அம்மையப்பன் ஊராட்சி ஒன்றிய நடுநிலைப் பள்ளியில் ரூ.35.40 லட்சத்தில் கட்டப்படும் இரண்டு வகுப்பறைகள், எண்கண் ஊராட்சியில் புதிதாக கட்டப்பட்டுவரும் பேருந்து நிலையம், பெரியதோப்பு கிராமத்தில் கலைஞரின் கனவு இல்லம் திட்டத்தின்கீழ் பயனாளிகளால் கட்டப்பட்டு வரும் 2 வீடுகள் ஆகியவற்றை ஆட்சியா் ஆய்வு செய்தாா்.

தொடா்ந்து, திருக்கண்ணமங்கை ஊராட்சியில் ரூ.14.31 லட்சம் மதிப்பில் கட்டப்பட்டுவரும் அங்கன்வாடி மையம், நபாா்டு திட்டத்தில் ரூ.1.21 கோடியில் திருக்கண்ணமங்கை - எட்டியலூா் இணைப்புச் சாலைப் பணி, அகரதிருநல்லூா் ஊராட்சியில் மகாத்மா காந்தி தேசிய ஊரக வேலை உறுதித் திட்டத்தின் கீழ் கிராமச் சாலையின் இருபுறமும் மரக்கன்றுகள் நடும் பணி ஆகியவற்றை பாா்வையிட்டு, பணிகளை விரைந்து முடிக்க அதிகாரிகளுக்கு அறிவுறுத்தினாா்.

ஆய்வின்போது, கொரடாச்சேரி ஒன்றியக் குழுத் துணைத் தலைவா் பாலச்சந்தா், வட்டார வளா்ச்சி அலுவலா்கள் விஸ்வநாதன், செந்தில், வட்டாட்சியா் ஜெகதீசன் உள்ளிட்டோா் உடனிருந்தனா்.