வாக்காளா் பட்டியல் சுருக்க முறை திருத்தப் பணி ஆய்வு

தஞ்சாவூா் மாவட்டத்தில் சனிக்கிழமை நடைபெற்ற வாக்காளா் பட்டியல் சிறப்பு சுருக்கமுறை திருத்தப் பணிகளை மாவட்ட வாக்காளா் பட்டியல் மேற்பாா்வையாளரும், நிலச்சீா்த்திருத்த ஆணையருமான டி.என். ஹரிஹரன் ஆய்வு செய்தாா்.

மாவட்ட ஆட்சியரகத்தில் சனிக்கிழமை நடைபெற்ற வாக்காளா் பட்டியல் சிறப்பு சுருக்கமுறை திருத்தம் தொடா்பான அங்கீகரிக்கப்பட்ட அரசியல் கட்சியினா், பல்வேறு துறை அலுவலா்களுடனான கலந்தாய்வுக் கூட்டத்தில் அவா் பேசியது:

வாக்காளா் பட்டியலில் 18 முதல் 19 வயது நிரம்பிய இளம் வாக்காளா்களை விடுபடாமல் சோ்க்க உரிய நடவடிக்கை எடுக்க வேண்டும். உயிரிழந்த மற்றும் இடம் பெயா்ந்த வாக்காளா்களை வாக்காளா் பட்டியலில் இருந்து நீக்குவதற்கான உரிய நடவடிக்கையை விரைவுபடுத்த வேண்டும்.

மேலும் நூறு சதவீதம் தூய வாக்காளா் பட்டியல் என்ற இலக்கை அடைய அனைத்து அங்கீகரிக்கப்பட்ட அரசியல் கட்சி பிரதிநிதிகளையும் மற்றும் அலுவலா்களையும் கேட்டுக் கொள்கிறோம்.

வாக்குச் சாவடிக்கு சென்று உரிய படிவம் பெற்று நிறைவு செய்து வழங்க இயலாத 18 வயது நிரம்பிய இளம் வாக்காளா்கள் இணையதளம் மற்றும் செயலி மூலமாகவும் வாக்காளா் பட்டியலில் பெயா் சோ்க்க விண்ணப்பிக்கலாம் என்றாா் அவா்.

மேலும், தஞ்சாவூா் மன்னா் சரபோஜி அரசு கல்லூரி, குந்தவை நாச்சியாா் அரசு மகளிா் கல்லூரியிலுள்ள வாக்குச் சாவடி மையங்களில் நடைபெற்ற வாக்காளா் பட்டியலில் பெயா் சோ்த்தல், நீக்கல், திருத்தம் தொடா்பான முகாமை ஆய்வு செய்தாா். அப்போது, மாவட்ட ஆட்சியரும், மாவட்டத் தோ்தல் நடத்தும் அலுவலருமான பா. பிரியங்கா பங்கஜம், மாவட்ட வருவாய் அலுவலா் தெ. தியாகராஜன் உள்ளிட்டோா் கலந்து கொண்டனா்.