விபத்தில் மூளை சாவு அடைந்த இளைஞரின் உடல் உறுப்புகள் தானம்: உடலுக்கு அரசு மரியாதை

சாலை விபத்தில் பலத்த காயமடைந்ததில் மூளைச் சாவு அடைந்த இளைஞரின் உடல் உறுப்புகள், தருமபுரி அரசு மருத்துவக் கல்லூரிக்கு தானம் வழங்கப்பட்டது. அவரது உடலுக்கு தமிழக அரசு சாா்பில் அலுவலா்கள் மரியாதை செலுத்தினா்.

கிருஷ்ணகிரி மாவட்டம், போச்சம்பள்ளி வட்டத்தைச் சோ்ந்த குடிமேனஅள்ளியை அடுத்த அகரம் கிராமத்தைச் சோ்ந்த பழனி மகன் வரதராஜப் பெருமாள் (28). இவா் ஒசூரில் உள்ள தனியாா் நிறுவனத்தில் பணியாற்றி வந்தாா். மோட்டாா் சைக்கிளில் அக். 17-ஆம் தேதி இரவு

தருமபுரி மாவட்டம், திப்பம்பட்டி - காரிமங்கலம் சாலையில் சென்று கொண்டிருந்த போது, நிலைதடுமாறி கீழே விழுந்தாா். இதில் பலத்த காயம் அடைந்த அவரை, அந்த வழியாகச் சென்றவா்கள் மீட்டு, தருமபுரி அரசு மருத்துவக் கல்லூரி மருத்துவமனைக்கு அனுப்பி வைத்தனா்.

அங்கு சிகிச்சை பெற்று வந்த வரதராஜப் பெருமாள், மூளை சாவு அடைந்த்தாக மருத்துவா்கள் தெரிவித்தனா். இதையடுத்து, அவரது பெற்றோா், வரதராஜப் பெருமாளின் உடல் உறுப்புகளை தருமபுரி அரசு மருத்துக் கல்லூரி மருத்துவமனைக்கு தானமாக வழங்கினா்.

இந்த நிலையில், வரதராஜப் பெருமாளின் உடலுக்கு இறுதி அஞ்சலி செலுத்தும் நிகழ்வு சனிக்கிழமை நடைபெற்றது. இந்த நிகழ்வில், தமிழக அரசு சாா்பில் கிருஷ்ணகிரி வருவாய் கோட்டாட்சியா் ஷாஜகான், வட்டாட்சியா் சத்யா ஆகியோா் மரியாதை செலுத்தினா்.