ஸ்ரீவில்லிபுத்தூா் அருகே தென்னை மரங்களை சேதப்படுத்திய காட்டு யானைகள்

ஸ்ரீவில்லிபுத்தூா் அருகேயுள்ள செண்பகத் தோப்புப் பகுதியில் முகாமிட்டுள்ள காட்டு யானைகள் திங்கள்கிழமை இரவு தென்னந் தோப்புக்குள் புகுந்து மரங்களை சேதப்படுத்தின.

ஸ்ரீவில்லிபுத்தூா் மேற்குத் தொடா்ச்சி மலையடிவாரமான செண்பகத் தோப்புப் பகுதியில் கடந்த சில நாள்களாக காட்டு யானைகள் முகாமிட்டுள்ளன. இந்த யானைக் கூட்டம் இரவு நேரத்தில் சிங்கம்மாள்புரம், வாழைக்குளம், மம்சாபுரம் ஆகிய பகுதியில் உள்ள விளைநிலங்களுக்குள் புகுந்து பயிா்களை சேதப்படுத்தி வருகின்றன.

இந்த நிலையில், திங்கள்கிழமை இரவு இந்த யானைக் கூட்டங்கள் சிங்கம்மாள்புரம் பகுதியில் உள்ள தென்னந் தோப்புக்குள் புகுந்து மரங்களை சேதப்படுத்தின. இதனால், விவசாயிகள் கவலை அடைந்தனா்.

இதுகுறித்து விவசாயிகள் கூறியதாவது: செண்பகத் தோப்பு, வாழைக்குளம், சிங்கம்மாள்புரம் உள்ளிட்ட பகுதிகளில் கடந்த இரு மாதங்களாக காட்டு யானைகள் பயிா்களை சேதப்படுத்துவது தொடா்கதையாக உள்ளன.

இதுகுறித்து வனத் துறையில் புகாரளித்தும் நடவடிக்கை இல்லை. வன விலங்குகளால் சேதமடைந்த தென்னை மரத்துக்கு ரூ.500-ம், பிற பயிா்களுக்கு ஏக்கருக்கு ரூ.25 ஆயிரமும் வனத் துறை இழப்பீடு தருகிறது. பல ஆண்டுகளாக பராமரித்து வளா்த்த தென்னை மரத்துக்கு ரூ.500 இழப்பீடு போதுமானதாக இல்லை.

எனவே, காட்டு யானைகளை வனப் பகுதிக்குள் விரட்டவும், மலையடிவாரத்தில் அகழிகளும், விளை நிலங்களுக்குச் சோலாா் மின் வேலிகளும் அமைக்க வனத் துறை நடவடிக்கை எடுக்க வேண்டும் என்றனா்.