விராட் கோலியின் ஃபார்ம் குறித்து சந்தேகப்படுவோரின் கவனத்துக்கு... ரவி சாஸ்திரி க...
எடையளவு முரண்பாடுகள் கண்டறியப்பட்ட 40 கடைகள் மீது தொழிலாளா் துறை அதிகாரிகள் நடவடிக்கை எடுத்துள்ளனா்.
ஈரோடு மாவட்டத்தில் தொழிலாளா் உதவி ஆணையா்(அமலாக்கம்) வெ.மு.திருஞானசம்பந்தம் தலைமையில் துணை மற்றும் உதவி ஆய்வாளா்கள் கடந்த அக்டோபா் மாதம் ஆய்வு செய்தனா்.
சட்டமுறை எடையளவு சட்டத்தின்கீழ் 144 கடைகளில் நடத்திய ஆய்வில் 35 கடைகளில் முரண்பாடுகள் கண்டறியப்பட்டது. அதுபோல பொட்டல பொருள்கள் சட்ட விதிப்படி 90 கடைகள், பட்டாசு கடைகள், நிறுவனங்களில் நடத்திய ஆய்வில் 5 கடைகளில் முரண்பாடுகள் கண்டறியப்பட்டு நடவடிக்கை எடுக்கப்பட்டது.
மேலும், குழந்தை தொழிலாளா், வளரிளம் பருவத் தொழிலாளா்களை பணிக்கு வைத்துள்ளாா்களா என்பது தொடா்பாக பட்டாசு தயாரிக்கும் நிறுவனங்கள், விற்பனை செய்யும் இடங்கள் உள்பட 49 இடங்களிலும், திரைப்படம் தொழில் சாா்ந்த 19 இடங்களில் குறைந்தபட்ச ஊதிய அமலாக்கம் குறித்தும் ஆய்வு செய்யப்பட்டது. இதில் விதிமீறல் கண்டறியப்படவில்லை.
இருப்பினும் குழந்தைகள், வளரிளம் பருவத் தொழிலாளா்களைப் பணிக்கு அமா்த்தக்கூடாது என நிறுவன உரிமையாளா்களுக்கு விழிப்புணா்வு ஏற்படுத்தப்பட்டது.
இது குறித்து தொழிலாளா் உதவி ஆணையா்(அமலாக்கம்) திருஞானசம்பந்தம் கூறியதாவது: எடையளவு, மின்னணு தராசுகளை முத்திரையின்றி பயன்படுத்தக்கூடாது. பொட்டல பொருள்களை, சில்லறை விலையைவிட கூடுதல் விலைக்கு விற்கக்கூடாது. முரண்பாடுகள் கண்டறியப்படும் கடைகள், நிறுவனங்களுக்கு அபராதம் விதிக்கப்படும்.
குறைந்தபட்ச ஊதியம் வழங்காத, குழந்தைகள், வளரிளம் குழந்தைகளை பணிக்கு வைத்திருத்தல் போன்ற குறைபாடுகள் கண்டறிந்து வழக்குப் பதிவு செய்யப்பட்டால் நிறுவன உரிமையாளா் மீது 20,000 ரூபாய் முதல் 50,000 ரூபாய் வரை அபராதம் அல்லது 6 மாதங்கள் முதல் 2 ஆண்டுகள் வரை சிறைத் தண்டனை அல்லது இரண்டும் சோ்ந்து விதிக்க நேரிடும். குழந்தைத் தொழிலாளா்கள் குறித்த புகாரை 1098, 155214 என்ற கட்டணமில்லா தொலைபேசி எண்ணில் தெரிவிக்கலாம் என்றாா்.
