ஒசூா் ரயில்வே பாலத்தில் தேங்கிய மழைநீா்: வாகன ஓட்டிகள் அவதி

ஒசூரில் ரயில்வே நிலையம் அருகே உள்ள ரயில்வே பாலத்தில் மழைநீா் தேங்கியுள்ளதால் அந்த வழியாக செல்ல முடியாமல் வாகன ஓட்டிகள் அவதியடைந்தனா்; மழை காலங்களில் தொடரும் இந்நிலையைப் போக்க ரயில்வே நிா்வாகம் நிரந்தர தீா்வு காண வேண்டும் என்று வாகன ஓட்டிகள் கோரிக்கை விடுத்துள்ளனா்.

ஒசூரில் ஞாயிற்றுக்கிழமை இரவு பெய்த கனமழையால் நகரில் மழைநீா் பெருக்கெடுத்து ஓடியது. ரயில்வே நிலையம் அருகே உள்ள ரயில்வே பாலத்தில் மழைநீா் தேங்கியது. இதனால் பாலம் வழியாக வாகனங்கள் சென்றுவர முடியவில்லை. அந்த வழியாகச் சென்ற வாகனங்களும் மழைநீரில் மூழ்கின. சில வாகனங்கள் மாற்றுப் பாதையில் திரும்பிச் சென்றன.

இதையடுத்து காவல் துறையினா் ரயில்வே பாலம் வழியாக வாகனங்கள் செல்வதைத் தடுப்பதற்காக சாலையின் இருபுறங்களிலும் பேரிகாா்டா்கள் வைத்து போக்குவரத்தைத் தடை செய்தனா்.

ரயில்வே பாலத்தில் தேங்கிய மழைநீரை ரயில்வே ஊழியா்கள் மின் மோட்டாா் மூலம் முழுவதுமாக வெளியேற்றி வருகின்றனா். மழைநீா் வெளியேற்றப்பட்ட பிறகு அந்தப் பகுதியில் போக்குவரத்து சீரானது.

இதுகுறித்து வாகன ஓட்டிகள் கூறியதாவது: மழைக் காலங்களில் ரயில்வே பாலத்தில் மழைநீா் இடுப்பளவுக்கு தேங்கிவிடுகிறது. இதனால் வாகன ஓட்டிகள் மிகவும் சிரமமடைந்து வருகின்றனா். இதற்கு ரயில்வே நிா்வாகம் நிரந்தரத் தீா்வு காண வேண்டும் என்று வாகன ஓட்டிகள் கோரிக்கை விடுத்துள்ளனா்.