கல்லல் தனியாா் வங்கியில் பணம் மோசடி: வங்கி மேலாளா், துணை மேலாளா் கைது

காரைக்குடி அருகே கல்லல் தனியாா் வங்கியில் வாடிக்கையாளா்கள் அடகு வைத்த நகைகளை பயன்படுத்தி ரூ. 2 கோடியே 3 லட்சத்து 86 ஆயிரம் மோசடி செய்ததாக வங்கியின் மேலாளா், துணை மேலாளா் ஆகியோரை போலீஸாா் ஞாயிற்றுக்கிழமை கைது செய்தனா்.

சிவகங்கை மாவட்டம், காரைக்குடி அருகே கல்லல் தனியாா் வங்கியில் தஞ்சாவூா் மாவட்டம், பட்டுக்கோட்டை அருகேயுள்ள கோட்டைகுளத்தைச் சோ்ந்த விக்னேஷ் ( 34) மேலாளராகவும், சிவகங்கை மாவட்டம், காளையாா்கோயில் அருகேயுள்ள புலி கண்மாயைச் சோ்ந்த ராஜாத்தி (38) துணை மேலாளராகவும் பணிபுரிகின்றனா். இந்த வங்கியில் அந்தப் பகுதி மக்கள் நகைகளை அடகு வைத்து பணம் பெற்றனா்.

இந்த நிலையில், வங்கியின் மண்டல மேலாளா் கிருஷ்ணகுமாா் கடந்த சில நாள்களுக்கு முன்பு வங்கியில் ஆய்வு மேற்கொண்டாா். அப்போது, வங்கியில் அடகு வைக்கப்பட்ட நகை பொட்டலங்களில் சில பொட்டலங்கள் திறந்து இருந்தன.

இதனால், சந்தேகம் அடைந்த மண்டல மேலாளா் இதுகுறித்து மேலாளா் துணை மேலாளரிடம் மேற்கொண்டதில், அவா்கள் வங்கியில் பொதுமக்கள் அடகு வைத்த நகைகளை எடுத்துவிட்டு அதற்கு பதிலாக போலியான நகைகளை வைத்திருந்ததும், எடுத்த நகைகளை இதே வங்கியில் அவா்களுக்கு தெரிந்த நபா்கள் மூலம் மீண்டும் அடகு வைத்து ரூ. 2 கோடியே மூன்று லட்சத்து 86 ஆயிரத்து 973-ஐ கையாடல் செய்தது தெரியவந்தது.

இதுகுறித்து வங்கியின் மண்டல மேலாளா் கிருஷ்ணகுமாா் அளித்த புகாரின் பேரில் சிவகங்கை மாவட்ட காவல் கண்காணிப்பாளா் டோங்கரே பிரவீன் உமேஷ் மாவட்ட குற்றிப்பிரிவு காவல்துறையினா் விசாரணை நடத்த உத்தரவிட்டாா்.

அவரது உத்தரவின் பேரில் மாவட்ட குற்றப்பிரிவு ஆய்வாளா் மன்னவன், உதவி ஆய்வாளா் ஜான் டைட்டா்ஸ் ஆகியோா் வழக்குப் பதிவு செய்து வங்கியின் மேலாளா் விக்னேஷ், துணைமேலாளா் ராஜாத்தி ஆகியோரை கைது செய்து விசாரணை நடத்தினா்.

விசாரணையில் மேலாளா் விக்னேஷ் ஆன்லைன் ரம்மி விளையாட்டில் ஈடுபட்டதால் பணத்தை இழந்து இதை ஈடுகட்ட வங்கி நகையை எடுத்தது தெரியவந்தது. இதேபோல துணை மேலாளா் ராஜாத்தி தனக்கு கிடைத்த பணத்தை வேறு ஒருவா் மூலம் முதலீடு செய்துள்ளதும் தெரியவந்தது.

இதையடுத்து அவா்கள் இருவரையும் கைது செய்த போலீஸாா் ராஜாத்தியிடம் பணத்தை வாங்கி வைத்திருந்த ரமேஷ் ( 48), அவரது மகன் சதீஷ் ( 21) ஆகிய இரண்டு பேரையும் பிடித்து விசாரித்து வருகின்றனா். மேலும் பொதுமக்கள் வங்கியில் வைத்து அனைத்து நகைகளும் பாதுகாப்பாக வங்கியிலே இருப்பதாக தெரிவிக்கப்பட்டுள்ளது.