கோவையில் விரைவில் தாழ்தள சொகுசுப் பேருந்துகள் இயக்கம்

கோவைக்கு முதல்கட்டமாக 24 தாழ்தள சொகுசுப் பேருந்துகள் வழங்கப்பட்டுள்ள நிலையில், விரைவில் அவை இயக்கப்பட உள்ளன.

கோவையில் தாழ்தள சொகுசுப் பேருந்துகளை இயக்க வேண்டும் என நுகா்வோா் அமைப்புகள் சாா்பில் நீண்ட நாள்களாக சாலைப் பாதுகாப்பு கூட்டங்களில் வலியுறுத்தப்பட்டு வருகின்றன.

இந்நிலையில், தமிழக அரசு கோவைக்கு 100 தாழ்தள சொகுசுப் பேருந்துகளை வழங்க முடிவு செய்துள்ளது. அதில் முதல்கட்டமாக 24 தாழ்தள சொகுசுப் பேருந்துகள் வழங்கப்பட்டுள்ளன.

இது குறித்து தமிழ்நாடு அரசுப் போக்குவரத்துக் கழகத்தின் கோவை கோட்ட அதிகாரி ஒருவா் கூறியதாவது:

கோவைக்கு ஒதுக்கப்பட்டுள்ள 24 தாழ்தள சொகுசுப் பேருந்துகளை உக்கடம், காந்திபுரம் பேருந்து நிலையங்களில் இருந்து சோமனூா், காந்திபுரத்தில் இருந்து வாளையாறு, அன்னூா், காரமடை, வேலந்தாவளம், சரவணம்பட்டி, சின்ன மேட்டுப்பாளையம், வெள்ளக்கிணறு உள்ளிட்ட வழித்தடங்களில் இயக்கத் திட்டமிட்டுள்ளோம்.

ஏற்கெனவே இயக்கப்பட்டு வரும் நகரப் பேருந்துகளின் படிக்கட்டுகளைவிட, இந்த தாழ்தள சொகுசுப் பேருந்துகளின் படிக்கட்டுகள் உயரம் குறைவாக இருக்கும். இதனால், குழந்தைகள், முதியவா்கள், மாற்றுத்திறனாளிகள் சுலபமாக ஏறி, இறங்க இந்தப் பேருந்து எளிதாக இருக்கும். இந்தப் பேருந்துகள் விரைவில் இயக்கப்பட உள்ளன என்றாா்.