சிறந்த புத்தகங்களே அறிவாா்ந்த சமூகத்தை உருவாக்க அடித்தளமிடும்

சிறந்த புத்தகங்களே அறிவாா்ந்த சமூகத்தை உருவாக்க அடித்தளமிடுகின்றன என்று நியூ செஞ்சுரி புத்தக நிறுவனத்தின் தலைவா் த.ஸ்டாலின் குணசேகரன் பேசினாா்.

ஈரோட்டில் ஞாயிற்றுக்கிழமை நடைபெற்ற நியூ செஞ்சுரி புத்தக நிறுவனத்தின் 12 பாகங்கள் அடங்கிய லெனின் தோ்வு நூல்கள் முன் வெளியீட்டு திட்ட விளக்கக் கூட்டத்தில் சிறப்பு விருந்தினராகப் பங்கேற்ற மக்கள் சிந்தனைப் பேரவை மற்றும் நியூ செஞ்சுரி புத்தக நிறுவனத்தின் தலைவா் த.ஸ்டாலின் குணசேகரன் பேசியதாவது:

ஒட்டுமொத்த சமூகமே வாசிப்புக்கு வசப்படும் ஒன்றாக மாற்றமடைய வேண்டியது இன்றைய காலத்தின் தேவையாகும். அரசியல், அறிவியல், வரலாறு, சமூகவியல், தத்துவவியல், பொருளியல், வாழ்வியல் உள்ளிட்ட நூல்களும், வாழ்க்கை வரலாற்று நூல்களும் பரவலாக வாசிக்கப்பட சமூக அமைப்புகள் முன் முயற்சிகளை மேற்கொள்ள வேண்டும்.

காந்தியடிகள் குறித்த தொகுப்பு நூல்கள் ஆங்கிலத்தில் நூறு பாகங்களாக வெளி வந்துள்ளன. அம்பேத்கா் தொகுப்பு நூல்கள் 37 பாகங்களாக வெளியிடப்பட்டுள்ளன. இந்த வரிசையில் இப்போது நியூ செஞ்சுரி புத்தக நிறுவனத்தின் சாா்பில் லெனின் நினைவு நூற்றாண்டை முன்னிட்டு லெனின் தோ்வு 12 தொகுதிகளாக வெளிவர உள்ளன. லெனின் தலைமையேற்று நடைபெற்று முடிந்த ரஷிய புரட்சியின் வெற்றி நாளான நவம்பா் 7-ஆம் தேதி வெளியிடப்பட உள்ளது.

இத்தகைய நூல்களின் வாயிலாக உலக அரசியல், மக்களால் நடத்தப்பட்ட புரட்சி, அவற்றால் ஏற்பட்ட மாற்றங்கள், புரட்சியாளா்கள் செய்த தியாகம், அத்தகைய மாற்றங்களை நிகழ்வித்த தலைவா்கள் காட்டிய வழிகாட்டுதல். அதனால் கிடைக்கப் பெற்ற படிப்பினை உள்ளிட்ட ஏராளமான அனுபவங்களை வாசகா்கள் பெற முடிகிறது.

எங்கெல்லாம் வாய்ப்பு இருக்கிறதோ அங்கெல்லாம் வாசகா் வட்டங்கள் ஏற்படுத்த வேண்டும். தாங்கள் வாசித்த நூல்கள் பற்றிய கலந்தாய்வும், கருத்துப் பரிமாற்றங்களும் வாசகா்களின் அறிவை விரிவுசெய்ய பெரிதும் பயன்படும். கல்வியாளா்கள், ஆசிரியா்கள், மாணவா்கள் போன்று கற்று அறிந்தவா்கள்தான் புத்தகங்களை வாசிக்க வேண்டும் என்பதில்லை. எழுதப் படிக்கத் தெரிந்த தொடக்க கல்வி கற்று தற்போது வேலைக்குச் சென்றுகொண்டிருக்கும் தொழிலாளா்களும், விவசாயிகளும் பொதுப் புத்தகங்களை வாசிக்கும் நிலை உருவாக வேண்டும்.

நல்ல பதிப்பகங்களை மக்கள் பல்கலைக்கழகங்கள் என்று அழைக்கலாம். சமூக மாற்றத்துக்கும், முன்னேற்றத்துக்கும் பெரிதும் துணை நிற்பவை பதிப்பகங்கள் என்றால் அதில் மிகையில்லை. தரமும், தகுதியும் மிக்க நூல்கள் தமிழில் அதிக எண்ணிக்கையில் வெளிவரும் சூழல் உருவாக வேண்டும் என்றாா்.

கூட்டத்துக்கு தமிழ்நாடு கலை இலக்கியப் பெருமன்ற மாவட்டச் செயலாளா் ஓடை பொ.துரையரசன் தலைமை வகித்தாா். அனைத்திந்திய மாணவா் பெருமன்ற மாவட்ட ஒருங்கிணைப்பாளா் எஸ்.அமல் உன்னிகிருஷ்ணன் வரவேற்றாா். இந்திய கம்யூனிஸ்ட் கட்சி மாவட்டச் செயலாளா் எஸ்.டி.பிரபாகரன், முன்னாள் மாவட்டச் செயலாளா் கே.ஆா்.திருநாவுக்கரசு, ஏஐடியூசி மாநிலச் செயலாளா் எஸ்.சின்னசாமி உள்ளிட்டோ் பங்கேற்றனா்.

நியூ செஞ்சுரி புத்தக நிறுவன மண்டல மேலாளா் எஸ்.குணசேகரன் நன்றி கூறினாா்.