டெல்லி: அந்தரங்க வீடியோவை அழிக்க மறுத்த லிவ் இன் பார்ட்னர்; மாஜி காதலன் துணையோடு எரித்து கொன்ற பெண்

டெல்லியில் உள்ள காந்தி விகார் என்ற இடத்தில் அடுக்குமாடிக் குடியிருப்பு ஒன்றில் நான்காவது மாடியில் ரமேஷ் என்பவர் எரிந்த நிலையில் இறந்து கிடந்தார். போலீஸார் இது குறித்து வழக்குப்பதிவு செய்து விசாரித்து வந்தனர்.

ஆரம்பத்தில் வீட்டிலிருந்த ஏ.சி. வெடித்து தீவிபத்து ஏற்பட்டு ரமேஷ் இறந்திருக்க வேண்டும் என்று போலீஸார் கருதினர். 32 வயதாகும் ரமேஷ் யு.பி.எஸ்.சி தேர்வுக்குத் தயாராகி வந்தார். விசாரணையில் அவர் ஒரு பெண்ணுடன் தங்கி இருந்தது தெரிய வந்தது. இதையடுத்து கட்டிடம் இருந்த பகுதியிலிருந்த கண்காணிப்பு கேமரா பதிவுகளை போலீஸார் ஆய்வு செய்து பார்த்தனர். இதில் சம்பவம் நடந்த அன்று அதிகாலை 3 மணிக்கு இரண்டு பேர் முகத்தை மூடிக்கொண்டு அக்கட்டிடத்திற்குள் செல்வது பதிவாகி இருந்தது.

சிறிது நேரம் கழித்து அவர்கள் வெளியில் சென்றபோது ஒரு பெண்ணும் அவர்களுடன் வெளியில் சென்றார். அவர்கள் சென்ற சிறிது நேரத்தில் ரமேஷ் வசித்த வீட்டில் தீப்பிடித்துக்கொண்டது. சம்பவம் நடந்த வீட்டிற்கு அருகில் அப்பெண்ணின் போன் இருந்தது. அவரது போன் சிக்னலை ஆய்வு செய்தபோது தெரிய வந்தது.

இதையடுத்து டெல்லி போலீஸார் மொரதாபாத் பகுதியில் ரெய்டு நடத்தி அப்பெண்ணைக் கைது செய்தனர். அவரிடம் விசாரணை நடத்தியதில் கொலை செய்ததை ஒப்புக்கொண்டார். அவரிடம் விசாரணை நடத்தி அப்பெண்ணின் முன்னாள் காதலன் உட்பட மேலும் இரண்டு பேரைக் கைது செய்தனர்.

அப்பெண்ணிடம் நடத்திய விசாரணையில், ரமேஷ் அப்பெண்ணை அந்தரங்கமாக வீடியோ எடுத்து வைத்துக்கொண்டு அவற்றை அழிக்க மறுத்ததாகவும், இது குறித்து முன்னாள் காதலனுடன் பேசியபோது ரமேஷைக் கொலை செய்ய முடிவு செய்ததாகக் குறிப்பிட்டுள்ளார்.

மூன்று பேரும் அதிகாலை வீட்டிற்குள் நுழைந்து ரமேஷை கழுத்தை நெரித்து கொலை செய்துள்ளனர். பின்னர் ரமேஷ் உடல் மீது நெய், ஆயில் மற்றும் மதுபானத்தை ஊற்றி தீவைத்துள்ளனர். அதோடு வீட்டிலிருந்த சிலிண்டரையும் திறந்துவைத்துவிட்டு வெளியில் சென்று இருந்தனர்.

இதனால் தீப்பிடித்துக்கொண்டது. அவர்கள் தப்பிச்சென்றபோது லேப்டாப், ஹார்டு டிஸ்க் மற்றும் பொருட்களை எடுத்துச்சென்று இருந்தது விசாரணையில் தெரிய வந்தது. ரமேஷுடன் தங்கி இருந்த பெண் பி.எஸ்.சி. படித்து வந்தார்.