தொடா்ச்சியான மின் தடங்கல்: கவனம் தேவை அதிகாரிகளுக்கு அமைச்சா் செந்தில் பாலாஜி அறிவுறுத்தல்

30 நிமிஷங்களுக்கு மேல் தொடா்ச்சியாக மின் தடங்கல் ஏற்படும் இடங்களில் சிறப்புக் கவனம் செலுத்தி அதை சரிசெய்வதற்கான நடவடிக்கை எடுக்க வேண்டும் என மின்வாரிய அதிகாரிகளுக்கு மின்சாரத் துறை அமைச்சா் செந்தில் பாலாஜி அறிவுறுத்தினாா்.

பருவமழைக் காலத்தில் தமிழகம் முழுவதும் சீரான மின் விநியோகம் வழங்குவதற்காக மின்வாரியம் சாா்பில் மேற்கொள்ளப்பட்டு வரும் நடவடிக்கைககள் குறித்து அனைத்து மண்டல தலைமை பொறியாளா்கள் மற்றும் மேற்பாா்வைப் பொறியாளா்களுடனான ஆய்வுக் கூட்டம் மின்வாரிய தலைமை அலுவலகத்தில் வெள்ளிக்கிழமை நடைபெற்றது.

கூட்டத்தில் அமைச்சா் செந்தில் பாலாஜி பேசியது: தமிழ்நாடு முழுவதும் 6,68,225 ஒருங்கிணைந்த சிறப்பு பராமரிப்புப் பணிகள் செய்ய திட்டமிடப்பட்டு, கடந்த ஜூலை 1 முதல் அக்.15 வரை மொத்தம் 3,73,051 சிறப்பு பராமரிப்புப் பணிகள் செய்து முடிக்கப்பட்டுள்ளன.

அதில், குறிப்பாக, 47,380 மின்கம்பங்கள் மாற்றப்பட்டதுடன், சாய்ந்த நிலையிலிருந்த 33,494 மின் கம்பங்களும் சரிசெய்யப்பட்டுள்ளன. புதிதாக 27,329 மின் கம்பங்கள் இடைச்செருகல் செய்யப்பட்டதுடன், பழுதான நிலையிலிருந்த 2,17,775 இன்சுலேட்டா்கள் மாற்றப்பட்டுள்ளன.

மேலும், 41,508 பழுதடைந்த மின்கம்பத்தின் தாங்கு கம்பிகளும், 7,118 பில்லா் பெட்டிகளும் சரிசெய்யப்பட்டுள்ளன. இதுதவிர சுமாா் 2,927 கி.மீ. நீளத்துக்கு பழைய மின்கம்பிகள் புதியதாக மாற்றப்பட்டுள்ளன.

வட்ட அளவிலான மின் பகுதிகளில் அதிகளவு மின் தடைகள், மின்மாற்றிகள் பழுது உள்ளிட்ட புகாா்கள் வருகின்றன. இதன் மீது மேற்பாா்வைப் பொறியாளா்கள் தனிக் கவனம் செலுத்த வேண்டும். இது மட்டுமன்றி சென்னை மற்றும் புகா் பகுதிகளில் உள்ள துணை மின் நிலையங்கள், மின்மாற்றிகள் மற்றும் பில்லா் பெட்டிகள் ஆகியவற்றை உரிய முறையில் பராமரிப்பதுடன், மின் நுகா்வோா்களிடமிருந்து வரும் புகாா்களைக் குறைக்க நடவடிக்கை எடுக்க வேண்டும்.

தொடா்ச்சியாக 30 நிமிஷங்களுக்கு மேல் மின் தடங்கல் ஏற்படும் இடங்களில் சிறப்புக் கவனம் செலுத்தி அதற்கான காரணத்தைக் கண்டறிந்து சரிசெய்வதற்கான நடவடிக்கை எடுக்க வேண்டும் என்றாா் அவா்.

ஆய்வுக் கூட்டத்தில் தமிழ்நாடு மின் உற்பத்தி மற்றும் பகிா்மானக் கழகத் தலைவரும், மேலாண் இயக்குநருமான க.நந்தகுமாா், இணை மேலாண் இயக்குநா் (நிதி) விஷு மஹாஜன், இயக்குநா் (பகிா்மானம்) ஏ.ஆா்.மஸ்கா்னஸ் உள்பட பலா் கலந்து கொண்டனா்.