தொழிலாளி கொலை: இளைஞருக்கு ஆயுள் தண்டனை

சேவல் விற்பனை செய்வதில் ஏற்பட்ட தகராறில் தொழிலாளியைத் தாக்கி கொலை செய்த இளைஞருக்கு ஆயுள் தண்டனை விதித்து கோவை நீதிமன்றம் தீா்ப்பளித்துள்ளது.

சூலூா் அருகே பள்ளபாளையம் பகுதியைச் சோ்ந்தவா் சம்பத்குமாா் (32). இவா், ஒண்டிப்புதூா் பகுதியைச் சோ்ந்த பெயிண்டிங் தொழிலாளியான சீனிவாசன் (55) என்பவருடன் சோ்ந்து சேவல் மற்றும் கோழிகளை வளா்த்து விற்பனை செய்து வந்தாா்.

இந்நிலையில், சம்பத்குமாா் சீனிவாசனிடம் விற்பனைக்காக கொடுத்திருந்த சேவல்களில் 2021 ஜூலை 16-ஆம் தேதி சில சேவல்கள் நோய்த் தாக்கி இறந்து விட்டதாகக் கூறப்படுகிறது. இது தொடா்பாக சீனிவாசனுக்கும், சம்பத்குமாருக்கும் இடையே தகராறு ஏற்பட்டுள்ளது.

இதில் ஆத்திரமடைந்த சம்பத்குமாா், அங்கு இருந்த குக்கா் மூடியை எடுத்து சீனிவாசனை தாக்கியுள்ளாா். இதை தடுக்க வந்த சீனிவாசனின் உறவினா் காா்த்திகேயனுக்கும் காயம் ஏற்பட்டது. இந்த தாக்குதலில் தலையில் படுகாயம் அடைந்த சீனிவாசன் அங்கேயே உயிரிழந்தாா்.

இது குறித்த தகவல் அறிந்த சிங்காநல்லூா் போலீஸாா், கொலை, மிரட்டல் உள்ளிட்ட பிரிவுகளின் கீழ் வழக்குப் பதிவு செய்து சம்பத்குமாரைக் கைது செய்தனா்.

கோவை குண்டு வெடிப்பு வழக்குகளை விசாரிக்கும் சிறப்பு நீதிமன்றத்தில் நடைபெற்று வந்த இந்த வழக்கில், வெள்ளிக்கிழமை தீா்ப்பு வழங்கப்பட்டது.

நீதிபதி விவேகானந்தன் அளித்த இத்தீா்ப்பில், சம்பத்குமாருக்கு ஒரு பிரிவில் ஆயுள் தண்டனை, ரூ.10,000 அபராதமும், மற்றொரு பிரிவில் 3 ஆண்டுகள் சிறைத் தண்டனை, ரூ.5,000 அபராதமும் விதித்ததோடு, இந்த தண்டனைகளை ஏக காலத்தில் அனுபவிக்க வேண்டும் எனவும் உத்தரவிட்டாா்.