மனைவி மீது பெட்ரோல் வீசியதில் தீக்காயமடைந்த கணவரும், திருச்சி அரசு மருத்துவமனையில் செவ்வாய்க்கிழமை சிகிச்சை பலனின்றி உயிரிழந்தாா்.
திருச்சி அருகே பழங்கனாங்குடி சாலை ஹேப்பி நகரைச் சோ்ந்தவா் ராஜேந்திர பிரசாத் (56). விவசாயி. இவரது மனைவி ஹேமா பிந்து (50). மகன்கள் குணசேகா் (20), குருசாமி (20). இருவரும் பொறியியல் படிப்பு படித்து வருகின்றனா். மகள்கள் மருத்துவராக உள்ளனா்.
ஹேமா பிந்து அடிக்கடி சுவாமி கும்பிடுவது ராஜேந்திர பிரசாத்துக்கு பிடிக்கவில்லை. கடந்த செவ்வாய்க்கிழமை (நவ. 19) ஹேமா பிந்து, தனது மகன்களுடன் சுவாமி கும்பிட்டுக் கொண்டிருந்தபோது, ஆத்திரமடைந்த ராஜேந்திர பிரசாத், வீட்டில் இருப்பு வைத்திருந்த பெட்ரோலை எடுத்து ஹேமாபிந்து மற்றும் குணசேகா், குருசாமி மீது விசிறியுள்ளாா். அந்த பெட்ரோல் அங்கிருந்த தீப விளக்கில் பட்டு தீப்பிடித்துள்ளது.
இதில் படுகாயமடைந்த ஹேமா பிந்து, மகன்கள் குணசேகா், குருசாமி, ராஜேந்திர பிரசாத்தை அக்கம்பக்கத்தினா் மீட்டு சிகிச்சைக்காக திருச்சி மகாத்மா காந்தி நினைவு அரசு மருத்துவமனையில் சோ்த்தனா்.
அங்கு சிகிச்சை பலனின்றி ஹேமா பிந்து ஞாயிற்றுக்கிழமை (நவ. 24) உயிரிழந்தாா்.
இதுகுறித்து நவல்பட்டு போலீஸாா் கொலை வழக்குப் பதிந்து விசாரித்து வந்த நிலையில், ராஜேந்திர பிரசாத் செவ்வாய்க்கிழமை காலை சிகிச்சை பலனின்றி இறந்தாா்.
