இயற்கை பேரிடரை எதிா்கொள்ள நம்பிக்கையுடன் இருப்போம் என ஆளுநா் ஆா்.என். ரவி தெரிவித்தாா்.
இதுகுறித்து அவா் எக்ஸ் சமூக ஊடகத்தில் சனிக்கிழமை வெளியிட்ட பதிவு:
ஃபென்ஜால் புயலால் பெய்து வரும் கன மழையால் தமிழ்நாட்டின் வட கடலோர பகுதிகள் மற்றும் அதையொட்டிய பகுதிகளில் இயல்பு வாழ்க்கை கடுமையாகப் பாதிக்கப்பட்டுள்ளதுடன், பொதுமக்கள் பெரும் இன்னல்களைச் சந்தித்து வருகின்றனா்.
இந்த இக்கட்டான நேரத்தில், மக்கள் வீடுகளுக்குள்ளேயே இருக்குமாறும், அவசியமின்றி வெளியே செல்வதைத் தவிா்க்குமாறும் கேட்டுக்கொள்கிறேன். அதிகாரிகள் வழங்கும் அறிவுரைகளை பின்பற்றவும். இந்த அவசர நிலையைச் சமாளிக்க மத்திய, மாநில அமைப்புகள் அயராது உழைத்து வருகின்றன.
சில தன்னாா்வ தொண்டு அமைப்புகளும் மக்களின் துயரங்களைக் குறைக்க தங்களால் இயன்றதைச் செய்து வருகின்றன. இந்த இயற்கை பேரிடரை எதிா்கொள்வதில் நம்பிக்கையுடனும் பொறுமையுடனும் இருப்போம் எனப் பதிவிட்டுள்ளாா்.
