பொங்கல் பண்டிகைக்கு இலவச வேட்டி- சேலை உற்பத்திப் பணி தீவிரம்: அமைச்சா் ஆா்.காந்தி

பொங்கல் பண்டிகைக்காக ஆண்டுதோறும் வழங்கப்படும் இலவச வேட்டி, சேலைக்கான உற்பத்திப் பணிகள் தீவிரமாக நடைபெற்று வருவதாக கைத்தறி மற்றும் துணிநூல் துறை அமைச்சா் ஆா்.காந்தி தெரிவித்தாா்.

அந்தத் துறையின் செயல்பாடுகள் தொடா்பாக, எதிா்க்கட்சித் தலைவா் எடப்பாடி கே.பழனிசாமி தெரிவித்த கருத்துகளுக்கு பதிலளித்து அமைச்சா் ஆா்.காந்தி ஞாயிற்றுக்கிழமை வெளியிட்ட அறிக்கை:

குடிசைத் தொழில் போன்று வீடுகளிலேயே தறிகளை வைத்து நெசவு வேலை செய்து வரும் நெசவாளா்களுக்கு தொழில் வரி விதிக்க முயற்படுவதாகக் கூறுவது உண்மைக்குப் புறம்பானது. நெசவாளா் கூட்டுறவு சங்கங்களுக்கு அங்கீகரிக்கப்பட்ட நூற்பாலைகளில் இருந்து தரமான நூல்கள் கொள்முதல் செய்யப்பட்டு, உரிய தரப்பரிசோதனை செய்யப்பட்டு, கைத்தறி துணி உற்பத்திக்குப் பயன்படுத்தப்பட்டு வருகின்றன. நெசவாளா் கூட்டுறவு சங்கங்களுக்குத் தேவையான நூல்கள் மானியத்துடன் குறைந்த விலையில் வழங்கப்பட்டு வருகின்றன.

வேட்டி, சேலை திட்டத்தைப் பொருத்தவரை அவற்றை உற்பத்தி செய்வதற்குத் தேவையான தரமான நூல்கள் வழங்கப்பட்டுள்ளன.

இதன் மூலமாக பொங்கல் பண்டிகைக்குத் தேவையான 177.64 லட்சம் சேலைகளும், 177.22 லட்சம் வேட்டிகளும் உற்பத்தி செய்யப்பட்டு வருகின்றன. இவை கைத்தறி, பெடல் மற்றும் விசைத்தறிகள் வாயிலாக, தமிழ்நாட்டிலுள்ள நெசவாளா் கூட்டுறவு சங்கங்களால் மட்டுமே உற்பத்தி செய்யப்படுகின்றன.

வெளி மாநிலங்களில் இருந்து போலியாக தரமற்ற சேலைகளை குறைந்த விலைக்கு வாங்கப்படுவதாகக் கூறப்படும் குற்றச்சாட்டு அடிப்படை ஆதாரமற்றது.

அதிமுக ஆட்சியில் கைத்தறி நெசவாளா் கூட்டுறவுச் சங்கங்களுக்கு வழங்கப்படாமல் விட்டுச் சென்ற நிலுவைத் தொகை ரூ. 160 கோடியை திமுக அரசு பொறுப்பேற்றவுடன் முழுமையாக விடுவித்தது.

மேலும், 4 நிதியாண்டுகளில் கோ-ஆப்டெக்ஸ், கைத்தறி நெசவாளா் கூட்டுறவு சங்கங்கள் ஆகியவற்றுக்கு ரூ. 794.25 கோடி மானியத் தொகையாக விடுவிக்கப்பட்டுள்ளது.

கடந்த பேரவைத் தோ்தலையொட்டி, கைத்தறி நெசவாளா்களின் நலனுக்காக 13 வாக்குறுதிகள் அளிக்கப்பட்டன. அவற்றில் 12 வாக்குறுதிகள் திமுக அரசு பொறுப்பேற்ற 3 ஆண்டுகளில் நிறைவேற்றப்பட்டுள்ளன.

முதல்வா் மு.க.ஸ்டாலின் தலைமையிலான அரசு பொறுப்பேற்றது முதல், வேறெந்த அரசை விடவும், நெசவாளா்கள் நலன் மற்றும் பாதுகாப்பில் அதிகபட்ச அக்கறை செலுத்தி வருகிறது.

பல்வேறு வளா்ச்சி மற்றும் நலத்திட்டங்களை சிறப்பாகச் செயல்படுத்தி வரும் நிலையில், அவை குறித்து எதிா்க்கட்சித் தலைவா் எடப்பாடி பழனிசாமி ஏதும் அறியாமல் அரசியல் ஆதாயத்துக்காகக் கருத்துகள் தெரிவிப்பது கண்டிக்கத்தக்கது என்று தெரிவித்துள்ளாா்.