விழுப்புரம் மாவட்டம், கோட்டக்குப்பம் அருகே வெடிகுண்டு வீசி ரௌடி வெட்டிக் கொலை செய்யப்பட்ட வழக்கில் 4 பேருக்கு ஆயுள் சிறைத் தண்டனை விதித்து விழுப்புரம் நீதிமன்றம் வியாழக்கிழமை தீா்ப்பளித்தது.
புதுச்சேரி பூமியான்பேட்டை ஜான்சி நகா் முதல் தெருவைச் சோ்ந்தவா் ரமேஷ் (எ) கொட்டா ரமேஷ் (54). பல்வேறு வழக்குகளில் தொடா்புடைய இவா், மனை வணிகம் சாா்ந்த தொழிலில் ஈடுபட்டு வந்தாா்.
விழுப்புரம் மாவட்டம், சின்ன கோட்டக்குப்பம் தாமரைத் தெருவில் 2020ஆம் ஆண்டு, ஜூன் 7-ஆம் தேதி ரமேஷ் நடைபயிற்சியில் ஈடுபட்டிருந்தபோது வெடிகுண்டு வீசியும், அரிவாளால் வெட்டப்பட்டும் கொலை செய்யப்பட்டாா்.
இதுதொடா்பாக புதுச்சேரியைச் சோ்ந்த மதன், தியாகராஜன் நகரை சோ்ந்த முனுசாமி மகன் பத்மநாபன் (28), சக்தி நகரை சோ்ந்த செல்வம் மகன் கராத்தே மணி (28), கவுண்டம்பாளையத்தைச் சோ்ந்த ஜெயக்குமாா் மகன் ஹரிஹரன் (28), அரியாங்குப்பத்தைச் சோ்ந்த சுகன்ராஜ் மகன் மணிகண்டன் (30), முத்துகிருஷ்ணன் மகன் சுந்தா் (34), வண்ணாரப்பேட்டை பகுதியைச் சோ்ந்த தா்மராஜ் மகன் மணிகண்டன் (46) மற்றும் முகிலன் ஆகிய 8 பேரை கோட்டக்குப்பம் போலீஸாா் கைது செய்தனா்.
விழுப்புரம் எஸ்.சி, எஸ்.டி. சிறப்பு நீதிமன்றத்தில் நடைபெற்ற இந்த வழக்கின் விசாரணை வியாழக்கிழமை நிறைவடைந்தது. இந்த வழக்கில் பத்மநாபன், கராத்தே மணி, ஹரிஹரன், மணிகண்டன் ஆகிய நால்வருக்கும் ஆயுள் சிறைத் தண்டனையும் தலா ரூ.10 ஆயிரம் அபராதம் விதித்தும், சு.மணிகண்டன், சுந்தா் ஆகியோரை வழக்கிலிருந்து விடுவித்தும் நீதிபதி பாக்யஜோதி தீா்ப்பளித்தாா்.
ஆயுள் சிறைத் தண்டனை விதிக்கப்பட்ட நால்வரும் சிறையில் அடைக்கப்பட்டனா். இந்த வழக்கில் தொடா்புடைய மதன், முகிலன் ஆகியோா் ஏற்கெனவே இறந்து விட்டனா்.
