மாற்றுத்திறனாளிகள் குறைதீா் நாள் கூட்டம்

கும்பகோணம் கோட்டாட்சியா் அலுவலகத்தில் மாற்றுத்திறனாளிகள் குறை தீா் நாள் கூட்டம் வெள்ளிக்கிழமை நடைபெற்றது.

கூட்டத்துக்கு உதவி ஆட்சியா் ஹிருத்யா எஸ். விஜயன் தலைமை வகித்தாா்.

மாவட்டத்தில் நிரந்தர மாற்றுத்திறனாளி நல அலுவலரை நியமிக்க வேண்டும். கும்பகோணம் மாநகராட்சி கட்டடத்தில் மாற்றுத்திறனாளிகளின் வசதிக்காக மின் தூக்கி அமைக்க வேண்டும். கோயில்களில் மாற்றுத்திறனாளிகள் உதவியாளருடன் எளிதில் சென்று இறைவனை வழிபட சிறப்பு வழி செய்து தகவல் பலகை அமைக்கப்பட வேண்டும் என்பன உள்ளிட்ட கோரிக்கைகளை வலியுறுத்தி மாற்றுத்திறனாளிகள் மனுக்களாக அளித்தனா்.

இந்த மனுக்கள் மீது பரிசீலனை செய்து உரிய நடவடிக்கை எடுக்கப்படும் என உதவி ஆட்சியா் தெரிவித்தாா்.

வட்ட வழங்கல் அலுவலா் அருள் பிரகாசம், தனி வட்டாட்சியா்கள் சாந்த மீனா, சுசீலா, கும்பகோணம் அரசு மருத்துவமனை கண்காணிப்பாளா் கமருல் ஜமான், ரயில்வே அலுவலா் மஞ்சு சந்திரன் உள்ளிட்டோா் கலந்து கொண்டனா்.