மீனவா்கள் மீதான தாக்குதலைத் தடுக்கக் கோரி வழக்கு: மத்திய, மாநில அரசுகள் பதிலளிக்க உத்தரவு

இலங்கைக் கடற்படையால் தமிழக மீனவா்கள் தாக்கப்படுவதைத் தடுக்கக் கோரிய வழக்கில், மத்திய, மாநில அரசுகள் பதிலளிக்க சென்னை உயா்நீதிமன்ற மதுரை அமா்வு சனிக்கிழமை உத்தரவிட்டது.

மதுரையைச் சோ்ந்த ரமேஷ் சென்னை உயா்நீதிமன்ற மதுரை அமா்வில் தாக்கல் செய்த பொது நல மனு:

இலங்கைக் கடற்படையினரால் தமிழக மீனவா்கள் தாக்கப்படும் நிகழ்வுகள் அடிக்கடி நடைபெறுகின்றன. எனவே, இந்திய கடற்படையினா் தமிழக மீனவா்களுக்கு பாதுகாப்பு வழங்க இடைக்கால உத்தரவு பிறப்பிக்க வேண்டும். இலங்கைக் கடற்படையினரால் தமிழக மீனவா்கள் கொல்லப்படுவதையும், அவா்களது வலைகளைப் பறித்து கைது செய்வதையும் தடுக்கும் வகையில், இலங்கை அரசுடன் இந்திய அரசு பேச்சுவாா்த்தை நடத்த அறிவுறுத்த வேண்டும் என அவா் கோரியிருந்தாா்.

இந்த மனு உயா்நீதிமன்ற நீதிபதிகள் ஆா். சுப்பிரமணியன், எல். விக்டோரியா கௌரி அமா்வு முன் சனிக்கிழமை விசாரணைக்கு வந்தது. அப்போது மத்திய அரசு வழக்குரைஞா் முன்வைத்த வாதம்: இந்த வழக்கில் பிரதமா் அலுவலக முதன்மைச் செயலா் தேவையின்றி சோ்க்கப்பட்டிருக்கிறாா். அவரது பெயரை வழக்கிலிருந்து நீக்க வேண்டும் என்றாா்.

இதைப் பதிவு செய்து கொண்ட நீதிபதிகள் பிறப்பித்த உத்தரவு:

பிரதமா் அலுவலக முதன்மைச் செயலரை வழக்கில் சோ்த்ததில் என்ன தவறு உள்ளது?. ஏன் அவரை வழக்கிலிருந்து நீக்க வேண்டும்?. மீனவா்கள் தாக்கப்படுவது குறித்து பிரதமா் பேச்சுவாா்த்தை நடத்தினால் நிலைமை சரியாகும் என மனுதாரா் கருதுகிறாா். இதில் தவறு எதுவும் இல்லை.

மனுதாரரின் கோரிக்கை குறித்து பிரதம அலுவலக முதன்மைச் செயலா், மத்திய உள்துறைச் செயலா், மத்திய அரசின் வெளியுறவுத் துறைச் செயலா், தமிழக அரசு தரப்பில் பதில் மனு தாக்கல் செய்ய வேண்டும். வழக்கு விசாரணை ஒத்திவைக்கப்படுகிறது என்றனா் நீதிபதிகள்.