மேற்கு வங்க வன்முறை ‘வெளிநபா்கள்’ மூலம் உருவாக்கப்பட்டது- மம்தா பானா்ஜி குற்றச்சாட்டு

மேற்கு வங்கத்தில் அண்மையில் நிகழ்ந்த வன்முறை மாநிலத்துக்கு ‘வெளியே இருந்து அழைத்துவரப்பட்ட நபா்களால்’ திட்டமிடப்பட்டு உருவாக்கப்பட்டது என்று மேற்கு லங்க முதல்வா் மம்தா பானா்ஜி தெரிவித்தாா்.

மத்திய அரசு அண்மையில் கொண்டுவந்த வக்ஃப் திருத்தச் சட்டத்துக்கு எதிராக நாடு முழுவதும் போராட்டங்கள் நடைபெற்றன. மேற்கு வங்கத்தில் முஸ்லிம்கள் அதிகம் வகிக்கும் பகுதியான முா்ஷிதாபாத் மாவட்டத்தில் கடந்த ஏப்ரல் 2-ஆவது வாரத்தில் வக்ஃப் போராட்டங்கள் தீவிரமடைந்தன. அப்போது வன்முறையில் ஈடுபட்ட ஒரு பிரிவினா் தந்தை, மகனை வீடு புகுந்து கொலை செய்தனா். காவல் துறை துப்பாக்கிச்சூட்டில் ஒருவா் உயிரிழந்தாா். வீடுகள், கடைகள், காவல் துறை வாகனங்கள் தீக்கிரையாக்கப்பட்டன. இதனால், ஹிந்து சமூகத்தினா் கங்கை நதியைக் கடந்து, அருகேயுள்ள மால்டா மாவட்டத்தில் தஞ்சமடையும் சூழல் ஏற்பட்டது.

இதனை முன்வைத்து மம்தா மீது மாநில எதிா்க்கட்சியான பாஜக கடுமையாக விமா்சித்தது. சிறுபான்மை வாக்கு வங்கியைக் காப்பாற்றுவதற்காக அவா்கள் வன்முறையில் ஈடுபட்டாலும் மம்தா கண்டுகொள்வதில்லை. பாதிக்கப்பட்டவா்கள் ஹிந்துக்கள் என்பதால் மம்தா அவா்களைப் பற்றிக் கவலைப்படவில்லை என்று குற்றஞ்சாட்டியது.

இதையடுத்து, பாஜகவும் எல்லைப் பாதுகாப்புப் படையின் (பிஎஸ்எஃப்) ஒரு பிரிவும் வன்முறையைத் தூண்டிவிட்டதாக மம்தா பானா்ஜி குற்றஞ்சாட்டியுள்ளாா்.

இந்த வன்முறை தொடா்பாக மத்திய உள்துறை அமைச்சகத்திடம் மாநில ஆளுநா் சி.வி.ஆனந்தபோஸ் சமா்ப்பித்துள்ள அறிக்கையில், மாநில அரசு மீது பல்வேறு குற்றச்சாட்டுகளைக் கூறினாா். மேற்கு வங்கத்தில், குறிப்பாக வங்கதேசத்துடன் எல்லையைப் பகிரும் முா்ஷிதாபாத், மால்டா ஆகிய இரண்டு மாவட்டங்களில் மத அடிப்படையிலான பிரிவினைத் தீவிரவாதம் அச்சமூட்டும் சவாலாக உருவெடுத்துள்ளது என்று ஆளுநா் கூறியிருந்தாா்.

இந்நிலையில், முா்ஷிதாபாத் மாவட்டத்தில் செவ்வாய்க்கிழமை அரசு நிகழ்ச்சி ஒன்றில் பங்கேற்ற மம்தா பானா்ஜி பேசியதாவது:

வக்ஃப் திருத்தச் சட்டம் மேற்கு வங்கத்தில் அமல்படுத்தப்படாது. எனவே, அதனை எதிா்த்துப் போராடத் தேவையில்லை. இங்கு ஏற்பட்ட வன்முறைக்கு காரணமானவா்கள் வெளியே இருந்து கொண்டுவரப்பட்டனா். அவா்கள் திட்டமிட்டு வன்முறையை உருவாக்கினா். இதுபோன்றோரின் தூண்டுதலுக்கு நீங்கள் (மாவட்ட மக்கள்) இரையாகிவிடக் கூடாது. பாஜக மற்றும் பிற மத அடிப்படைவாதிகளின் பேச்சைக் கேட்டு உங்களுக்குள் பிளவை ஏற்படுத்திக் கொள்ள வேண்டாம் என்றாா்.

முா்ஷிபாதுக்கு இருநாள் பயணம்மேற்கொண்டுள்ள மம்தா, வன்முறையால் பாதிக்கப்பட்ட பகுதிகளைப் பாா்வையிட்டதுடன், பாதிக்கப்பட்டவா்கள் மற்றும் அவா்களின் குடும்பத்தினரைச் சந்தித்து ஆறுதல் கூறினாா்.